باقىت يندەكسى رەيتينگىسىندە قازاقستان تمد ەلدەرى اراسىندا كوش باستادى، دەپ حابارلايدى Dalanews.kz 24kz ارناسىنا سىلتەمە جاساپ.

جىل سايىنعى World Happiness Report رەيتينگىندە قازاقستان 43-ورىنعا يە بولدى. وسىلايشا ەلىمىز وزبەكستاننان 10 ورىنعا، رەسەيدەن 13، قىرعىزستاننان 32 ورىنعا جوعارى تۇر.

 بىلتىر قازاقستان بۇل تىزىمدە 49-ورىنعا كوتەرىلگەن بولاتىن. ايتا كەتەيىك، World Happiness Report – بۇل Gallup، بىرىككەن ۇلتتار ۇيىمى جانە وكسفورد ۋنيۆەرسيتەتى جىل سايىن جاريالايتىن رەيتينگ.

وندا 140-تان استام ەلدەگى باقىت يندەكسى ەسەپتەلەدى. باقىت يندەكسى جان باسىنا شاققانداعى جالپى ىشكى ءونىم، الەۋمەتتىك قولداۋ، ءومىر ءسۇرۋ ۇزاقتىعى، ەركىندىك، جومارتتىق جانە ازاماتتاردىڭ مەملەكەتتىك ينستيتۋتتارعا سەنىمىن، سونىمەن بىرگە رەسپوندەنتتەردىڭ ومىرگە قاناعاتتانۋشىلىق دەڭگەيىن انىقتاۋ ارقىلى ەسەپتەلەدى.

قازاقستاندا 2019 جىلدان باستاپ ءومىر ءسۇرۋ ۇزاقتىعى 73-تەن 75 جاسقا دەيىن ۇزاردى. جالپى ءولىم-جىتىم 7،8%-كە، انا ءولىمى 26،3%-كە، نارەستە ءولىمى 15،8%-كە تومەندەدى.

پرەمەر-مينيستر ولجاس بەكتەنوۆ قاسىم-جومارت توقايەۆتىڭ پرەزيدەنتتىك قىزمەتىنىڭ التى جىلدىعىنا ارنالعان ماقالاسىندا جان باسىنا شاققانداعى ىشكى جالپى ءونىم ەكى ەسەگە جۋىق وسكەنىن  اتاپ وتكەن ەدى.