ارتىنشا، پرەزيدەنتتىڭ جارلىعىمەن ابيبۋللايەۆ ەلشى قىزمەتىنەن بوساتىلدى.
الايدا، گۇلشارا ءابدىقالىقوۆا مەمقىزمەتكەر ەتيكاسى ناقتى قالاي بۇزىلعانىن سول كۇيى ايتقان جوق. ياعني، ءوزىنىڭ ۇلتجاندىعىمەن، ساۋاتتىلىعىمەن كوزگە ءتۇسىپ ۇلگەرگەن التاي ابيبۋللايەۆتىڭ ناقتى نە ءۇشىن جۇمىستان كەتكەنى حالىققا بەلگىسىز.
رەسمي وكىلدەر اشىق مالىمدەمەسە دە، سول سىرتقى ىستەر مينيسترلىگىنىڭ ماڭايىندا جۇرگەن "ۇزىنقۇلاقتار" ماسەلەنىڭ ءمان-جايىن "سىبىرلاپ" ۇلگەردى.
ەستۋىمىزشە، ابيبۋللايەۆتىڭ جاۋاپكەرشىلىككە تارتىلۋىنا ورىسشا سويلەمەۋى سەبەپ بولعان.
تارقاتىپ ايتساق، پولشاداعى كاسىپكەرلەرمەن كەزدەسكەن قازاقستان ەلشىسى بايانداماسىن قازاق جانە پولياك تىلدەرىندە جاساعان ەكەن. الايدا بۇعان شامدانعان ءورىستىلدى ورتا باياندامانى ورىسشا جاساۋىن تالاپ ەتكەن. ال التاي يبراگيم ۇلى بۇل تالاپتى ورىنداۋدان باس تارتىپتى.
"ارينە، بۇل تەك سىبىس قانا. ماسەلەنىڭ ناقتى ءمان-جايىن قازاقستاننىڭ بيلىك وكىلدەرى رەسمي ايتىپ بەرەدى دەگەن سەنىم بار"، - دەپ جازادى ب ا ق.
تانىمال ساياساتتانۋشى راسۋل جۇمالى دا ابيبۋللايەۆتىڭ مەمقىزمەتكەردىڭ ەتيكەتىن بۇزاتىنداي ساۋاتسىز ەمەس ەكەنىنە كۇماندانبايدى.
"التاي ابيبوللايەۆ ساۋاتتى دا مەملەكەتشىل، قولىنان ءىس كەلەتىن ەلشىلەردىڭ ءبىرى. نە ءۇشىن مانساپتان ايىردى؟ سەبەبى نەگە ايتىلمايدى؟ سونىسىنا قاراعاندا ارانداتۋ ارەكەتى سياقتى. كەزىندە ديپلومات بولعاندا مەنىڭ دە ارتىمنان تالاي ارىز جازىلعان بولاتىن "اگاشكالارعا" باس يمەگەنىم ءۇشىن. سوعان ۇقسايدى. قالاي بولعاندا وكىنىشتى جاعداي كاسىبي مامانداردىڭ قۋدالانىپ، ءپاتۋاسىز ىعاي-سىعايدىڭ سالتانات قۇرىپ وتىرعانى. كەرىسىنشە بولۋ كەرەك"، - دەپ جازدى ساياساتتانۋشى ءوزىنىڭ Facebook پاراقشاسىندا.
