قازاقستاندا بالالاردىڭ ءتىسىن ەمدەۋ كەزىندە ناركوز قولدانۋعا شەكتەۋ قويىلمايدى. بۇل تۋرالى دەنساۋلىق ساقتاۋ ءمينيسترىنىڭ ءبىرىنشى ۆيسە-مينيسترى تيمۋر سۇلتانعازييەۆ مالىمدەدى، دەپ حابارلايدى Dalanews.kz.
"ستوماتولوگيالىق كومەكتى ۇيىمداستىرۋ ستاندارتتارى مەن كلينيكالىق پروتوكولدار بار. ولار حالىقارالىق عىلىمي پراكتيكاعا سايكەس ازىرلەنگەن جانە بەكىتىلگەن. دەنساۋلىق ساقتاۋ مينيسترلىگى بۇل باعىتتا شەكتەۋ قويمايدى"، – دەدى سۇلتانعازييەۆ.
مينيسترلىك بالالاردا اۋىرسىنۋدى كوتەرە المايتىن جاعدايلاردا ناركوز قولدانۋ ورىندى دەپ سانايدى.
"بۇل شەشىمدى دارىگەر ءوزى قابىلداۋى ءتيىس، بالانىڭ جاعدايىنا جانە اۋىرسىنۋدى كوتەرۋ مۇمكىندىگىنە بايلانىستى. سوندىقتان دارىگەر ءتيىستى دارى-دارمەكتەردى نەگىزدەپ تاعايىنداۋى كەرەك"، – دەپ اتاپ ءوتتى ول.
سونداي-اق، ول ناركوز قولدانۋ پروسەسىن دۇرىس ۇيلەستىرۋ جانە بالانىڭ جاعدايىن باقىلاۋ مىندەتتى ەكەنىن ايتتى.
