ءبىر كۇن بۇرىن مينيسترلىك "قازاقستان بيلىگى Facebook جەلىسىنىڭ ىشكى جۇيەسىنە كىرىپ، ءوزى "زياندى" دەپ تاپقان كونتەنتتى حابارلاۋعا ەكسكليۋزيۆتى مۇمكىندىك الدى" دەپ حابارلاعان. ۆەدومستۆو Facebook'پەن "زياندى كونتەنتتەرمەن كۇرەس ماسەلەلەرى بويىنشا تىعىز قارىم-قاتىناس جاساعانى جونىندە كەلىسىمگە كەلگەنىن" ايتقان.
كوپ ۇزاماي Facebook جەلىسىنە يە Meta Platforms كومپانياسىنىڭ ازيا-تىنىق مۇحيتى ايماعى بويىنشا كوممۋنيكاسيا ءبولىمىنىڭ ديرەكتورى بەن ماككوناحي قازاق ۇكىمەتىمەن ورتاق مالىمدەمە جاساعانىن تەرىستەدى.
اقپارات جانە قوعامدىق دامۋ ءمينيسترى ايدا بالايەۆا 2 قاراشادا Facebook'تاعى جازباسىندا:
"اقپارات جانە قوعامدىق دامۋ مينيسترلىگى نەگىزگى كەلىسسوزدەردى گونكونگ قالاسىندا ورنالاسقان جۇڭگو، موڭعوليا جانە ورتالىق ازيا ءوڭىرى بويىنشا "Meta" ("Facebook") كومپانياسىنىڭ وڭىرلىك وفيسىمەن جۇرگىزدى. 1 قاراشادا جاريالانعان بىرىككەن مالىمدەمەنىڭ ءماتىنى مەن ونىڭ باق-دا جاريالانۋى اتالعان ايماقتىق كەڭسەنىڭ باسشىلىعىمەن تولىقتاي كەلىسىلگەن بولاتىن" دەپ جازدى.
مينيستر سوزىنە رەاكسيا بىلدىرگەن كەيبىر قولدانۋشىلار ءاۋ باستان-اق ۆەدومستۆو اقپارات قۇرالدارىن شاتىستىرماي "كەلىسسوز كومپانيانىڭ وڭىرلىك كەڭسەسىمەن كەلىسىمگە كەلدى" دەپ انىقتاپ جازۋى ءتيىس ەدى دەپ اتاپ ءوتتى.
Facebook'پەن "كەلىسىم" جونىندە قايشى اقپاراتتار قازاقستان پارلامەنتىندە الەۋمەتتىك جەلىلەردى شەكتەۋ مۇمكىندىگىن قاراستىراتىن زاڭ جوباسى تالقىلانىپ جاتقان شاقتا جاريالانىپ وتىر.
اتالعان جوبا جۇرت اراسىندا قارسىلىققا ۇشىراپ، ازاماتتىق قوعام وكىلدەرى بيلىك ەلدە سەنزۋرانىڭ جاڭا ءادىسىن ويلاپ تاپتى دەپ سىناعان. ال زاڭ جوباسىنىڭ اۆتورلارى "بۇل كيبەربۋللينگ پەن ءقاۋىپتى كونتەنتتەردىڭ تاراۋىن توقتاتادى" دەپ مالىمدەگەن.
قازاقستان بيلىگى ەلدە كەمى 3،2 ميلليون ادام Facebook جەلىسىن قولدانادى دەپ مالىمدەدى. ال Meta كومپانياسىنىڭ Instagram جانە WhatsApp جەلىلەرىنىڭ دە قازاقستانداعى قولدانۋشىلارى كوپ.
بۇعان دەيىن ادام قۇقىعىن قورعاۋشىلار Facebook'ءتى الەم ۇكىمەتتەرىنىڭ اقپارات بوستاندىعىن شەكتەيتىن وتىنىشتەرىنە بويۇسىنادى دەپ ايىپتاعان.
