پاۆلودار وبلىسىندا جاعا ۇستاتارلىق وقيعا: ەكس-شەنەۋنىك، AMANAT پارتياسىنىڭ بۇرىنعى مۇشەسى سەرىكقان جاقۇپوۆ جەتى جاسار بالانى زورلاعانى ءۇشىن ءومىر بويىنا باس بوستاندىعىنان ايىرىلدى، دەپ حابارلايدى Dalanews.kz Orda.kz-كە سىلتەپ.
وقيعانىڭ ەڭ جان تۇرشىگەرلىك تۇسى – ءجابىر كورگەن ءبۇلدىرشىن جاقۇپوۆتىڭ ءوز ايەلىنىڭ تۋعان جيەنى بولىپ شىقتى. سوتقا دەيىن ونىڭ ايەلى كۇيەۋىنىڭ مۇنداي قىلمىسقا بارعانىنا سەنبەي، تەمىر تورعا تۇراقتى تۇردە تاماق تاسىپ تۇرعان ەكەن.
جاقۇپوۆتىڭ اتى بۇرىن وبلىستاعى لاۋازىمدى تۇلعا رەتىندە بەلگىلى ەدى: ول اقسۋ اۋدانى اكىمدىگىنىڭ اپپاراتىن باسقارعان، كەيىن اۋداندىق ءماسليحات دەپۋتاتى بولىپ سايلانعان. AMANAT پارتياسىندا جۇرگەندە مەملەكەتتىك قىزمەتكەرلەردىڭ ادەپ ماسەلەلەرىنە جاۋاپتى بولعان ادام ەكەنى دە كوپشىلىكتىڭ اشۋىن تۋدىردى.
AMANAT پارتياسى بۇل جانجال باستالىسىمەن-اق جاقۇپوۆتان دەرەۋ ىرگەسىن اۋلاق سالىپ، ونىڭ پارتيادان «ءوز ەركىمەن» تامىز ايىندا شىعىپ كەتكەنىن مالىمدەگەن بولاتىن.
قوعامدى دۇرلىكتىرگەن وسى وقيعا بيلىكتەگى ادامداردىڭ بەتپەردەسىنىڭ ارعى جاعىندا قانداي «قۇبىجىق» جاسىرىنعانىن كورسەتكەندەي بولدى. اسىرەسە، ەتيكاعا جاۋاپتى بولعان بۇرىنعى اماناتتىقتىڭ بۇل قىلمىسى ەلدىڭ بيلىك پەن قوعامعا دەگەن سەنىمىن تاعى ءبىر مارتە شايقالتتى. سوتتىڭ قاتاڭ ۇكىمى دە وسىنى اڭعارتسا كەرەك.
