اقتاۋدا 2024 جىلعى 25 جەلتوقساندا بولعان ازەربايجان اۆياكومپانياسىنىڭ ۇشاق اپاتىنان قازا تاپقانداردى ەسكە الۋ شاراسى ءوتتى. بۇل تۋرالى azertag.az باسىلىمى جازدى، - دەپ حابارلايدى Dalanews.kz.
ءىس-شارانى ازەربايجاننىڭ قازاقستانداعى ەلشىلىگى جانە ماڭعىستاۋ وبلىسىنىڭ اكىمدىگى ۇيىمداستىرعان.
ەسكە الۋعا ماڭعىستاۋ وبلىسىنىڭ اكىمى نۇرداۋلەت قيلىباي، ازەربايجاننىڭ قازاقستانداعى ەلشىسى اگالار اتاموعلانوۆ، قازاقستاننىڭ ازەربايجانداعى ديپلوماتيالىق ميسسياسىنىڭ باسشىسى ءالىم بايەل، ازەربايجاننىڭ اقتاۋداعى باس كونسۋلى ايحان سۇلەيمانلى، قازا تاپقان قازاقستاندىقتاردىڭ وتباسى مۇشەلەرى، ازەربايجان دياسپوراسىنىڭ وكىلدەرى، قۇتقارۋ جۇمىستارىنا قاتىسقان مەكەمەلەر، اقتاۋ تۇرعىندارى قاتىسقان.
"ءىس-شارا بارىسىندا كاسىپكەر اميل يۋسيفوۆ قازا تاپقان قازاقستاندىقتاردىڭ جاقىندارىنا الماتىنىڭ جاڭا تۇرعىن ءۇي كەشەنىندەگى بەس بولمەلى پاتەردىڭ كىلتتەرىن تابىس ەتتى. ول ماڭعىستاۋ وبلىسىنىڭ توتەنشە جاعدايلار دەپارتامەنتىنە، اقتاۋ اۋرۋحاناسى مەن جەدەل جانە شۇعىل مەديسينالىق جاردەم ستانسياسىنا ءۇش جاڭا كولىك سىيعا تارتتى"، - دەپ جازىلعان حابارلامادا.
ءىس-شارادا ءسوز سويلەگەن ماڭعىستاۋ وبلىسىنىڭ اكىمى نۇرداۋلەت قيلىباي قازا تاپقانداردىڭ جاقىندارىنا كوڭىل ايتىپ، قازاقستان پرەزيدەنتى قاسىم-جومارت توقايەۆتىڭ تاپسىرماسى بويىنشا ۇشاق اپاتىنىڭ سالدارىن جويۋ جانە ونىڭ سەبەپتەرىن انىقتاۋ، زارداپ شەككەندەرگە كومەك كورسەتۋ جونىندەگى ۇكىمەتتىك كوميسسيا قۇرىلعانىن ايتتى.
ازەربايجاننىڭ قازاقستانداعى ەلشىسى اگالار اتاموعلانوۆ تراگەديا بارشانىڭ جۇرەگىندە تەرەڭ ءىز قالدىرعانىن جەتكىزدى.
"ءبىراق ول ءبىزدى بىرىكتىرگەنىن دە ايتقىم كەلەدى. تاعى دا بۇكىل الەمگە ءبىزدىڭ باۋىرلاس حالىقتار ەكەنىمىزدى كورسەتتى جانە بۇل سوزبەن ەمەس، ىسپەن دالەلدەندى. ءبىز مۇنى ءوز كوزىمىزبەن وسى جەردەن، اقتاۋدان كوردىك"، - دەدى ديپلومات.
ايتا كەتەيىك، 2024 جىلى 25 جەلتوقساندا جەرگىلىكتى ۋاقىت بويىنشا 11.30-دا اقتاۋ ماڭىندا باكۋدەن گروزنىيعا ۇشىپ بارا جاتقان ۇشاق اپاتقا ۇشىرادى. بۇل - Azerbaijan Airlines اۋەكومپانياسىنا تيەسىلى ەمبراەر 190 ۇشاعى.
اقپارات بويىنشا ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان.
اپاتتان 6 قازاقستاندىق كوز جۇمدى. جالپى قازا تاپقاندار سانى — 38. قايعىلى وقيعادان 29 ادام امان قالدى.
قايعىلى وقيعادان كەيىن ازەربايجاندا جالپىۇلتتىق ازا تۇتۋ كۇنى جاريالاندى.
