ازاماتتىق قورعاۋ جۇيەسىندە كەزدەيسوق ادامدار بولمايدى — مۇندا ادام ءومىرىن قۇتقارۋ مەن قاۋىپسىزدىكتى قامتاماسىز ەتۋدى ابىرويلى ءىس دەپ بىلەتىن جاندار قىزمەت ەتەدى. سونىڭ جارقىن مىسالى — ماڭعىستاۋ وبلىسى توتەنشە جاعدايلار دەپارتامەنتىنىڭ قىزمەتكەرلەرى، اعايىندى ەگىزدەر ەلدوس پەن ەلجاس حالەلوۆتار. بۇل ماماندىقتى ولار بىرلەسە تاڭداپ، جۇرەك قالاۋىمەن كەلگەن.
1998 جىلعى 26 ساۋىردە بەينەۋ اۋدانىندا دۇنيەگە كەلگەن ەلدوس پەن ەلجاس 2020 جىلى ازاماتتىق قورعاۋ اكادەمياسىن «ءورت قاۋىپسىزدىگى» ماماندىعى بويىنشا ءتامامدادى. سول كەزدەن باستاپ ەكەۋى دە توتەنشە جاعدايلار جۇيەسىندە ءارتۇرلى باعىتتاردا قىزمەت ەتۋدە.
ەلدوس حالەلوۆ — اقتاۋ قالاسى توتەنشە جاعدايلار باسقارماسىنىڭ باس مامانى. ونىڭ كۇندەلىكتى جۇمىسى — توتەنشە جاعدايلاردىڭ الدىن الۋ جانە ولاردى جويۋ شارالارىن ۇيلەستىرۋ، وقۋ-جاتتىعۋلارعا قاتىسۋ جانە حالىقتىڭ قاۋىپسىزدىگىن باقىلاۋ. ول ەڭ كۇردەلى ساتتەردە جۇيەنىڭ ءبىرقالىپتى جۇمىس ىستەۋىنە جاۋاپ بەرەدى.
ال ەلجاس حالەلوۆ سيفرلاندىرۋ، اقپاراتتاندىرۋ جانە بايلانىس بولىمىندە ەڭبەك ەتەدى. ول — اقپاراتتىق جۇيەلەر، بايلانىس قۇرالدارى مەن سيفرلىق پلاتفورمالاردىڭ ۇزدىكسىز جۇمىسىن قامتاماسىز ەتەتىن مامان. ونىڭ قىزمەتىنسىز شۇعىل ارەكەت ەتۋ دە، ناقتى تالداۋ جاساۋ دا مۇمكىن ەمەس، ال بۇل توتەنشە جاعدايلاردا شەشىم قابىلداۋدىڭ نەگىزى.
مىندەتتەرى ءارتۇرلى بولعانىمەن، ولاردىڭ جۇمىسى — ءبىرتۇتاس جۇيەنىڭ قوس قاناتى ىسپەتتەس. ءبىرى العى شەپتە ارەكەت ەتسە، ەكىنشىسى سەنىمدى تىلمەن قامتاماسىز ەتەدى. بۇل — ءداستۇرلى قىزمەت پەن زاماناۋي تەحنولوگيانىڭ ءتيىمدى ۇيلەسىم تابۋىنىڭ كورىنىسى.
«مەنىڭ جۇمىسىم تۇراقتى بايلانىس پەن ناقتى اقپاراتقا نەگىزدەلەدى. تەحنيكالىق جاعىنان باۋىرىمنىڭ قولداۋى ءاردايىم سەزىلەدى»، — دەيدى ەلدوس.
«ەلدوستا — ءورت بولسا، مەندە — جۇيەدە «وت» تۇتانادى»، — دەپ ەلجاس باۋىرىنىڭ ءسوزىن جالعاسادى.
حالەلوۆتار باۋىرلاردىڭ وقيعاسى — جاس ماماندار ءۇشىن شابىت كوزى. بۇل تەك ماماندىق جايلى ەمەس، ادالدىق، كوماندالىق جۇمىس پەن وتباسىلىق قولداۋدىڭ ارقاسىندا تج قىزمەتىنىڭ قانشالىقتى سەنىمدى بولا الاتىنىن دالەلدەيتىن شىنايى وقيعا.
