«بەرەكە» جانە «ەكوسەنتر» قوعامدىق بىرلەستىكتەرىنىڭ بىرلەسكەن ءىس-شاراسىنا اقش-تىڭ USAID اگەنتتىگى قارجىلاي قولداۋ كورسەتكەن. كونفەرەنسيانىڭ اشىلۋ سالتاناتىندا تۇركىستان وبلىسى اكىمىنىڭ ورىنباسارى ۇلاسبەك سادىبەكوۆ ءسوز سويلەپ، قوعامنىڭ دامۋىنا وڭىردەگى ۇكىمەتتىك ەمەس ۇيىمداردىڭ قوسار ۇلەسى مول ەكەنىن ايتتى.
كونفەرەنسيادا «قازاقستاننىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى اسىلبەك قوجاحمەتوۆ ازاماتتىق قوعامدى دامىتۋ جونىندە بايانداما جاساماق. سونداي-اق، شاعىن جانە اۋىلدىق تەرريتوريالاردا ازاماتتىق بەلسەندىلىكتى قولداۋ بويىنشا رەسەي تاجىريبەسى تۋرالى ايتىلادى دەپ كۇتىلۋدە.
جيىندا گەندەرلىك ساياسات، مۇمكىندىگى شەكتەۋلى ازاماتتار ماسەلەسى، ۇەۇ مەن مەملەكەتتىڭ بايلانىسىن ارتتىرۋ، اۋىل جاستارىنىڭ بەلسەندىلىگىن جوعارىلاتۋ جانە وزگە دە ماسەلەلەر بويىنشا ۇسىنىستار ايتىلىپ، باياندامالار جاسالادى دەپ جوسپارلانعان. شىمكەنتتەگى كونفەرەنسياعا ەلىمىزدىڭ تۇكپىر-تۇكپىرىنەن قوعامدىق بىرلەستىك ءتوراعالارى قاتىسىپ جاتىر.
«بەرەكە» قوعامدىق بىرلەستىگى حالىقارالىق ۇيىمداردىڭ قولداۋىمەن قازاقستاندا 20-دان استام ءىرى الەۋمەتتىك جوبالاردى جۇزەگە اسىرعان. وسى ارقىلى تۇركىستان، جامبىل، اقمولا جانە قاراعاندى وبلىستارىندا كوپتەگەن ءىس-شارالار وتكىزىلدى. «بەرەكە — ىنتىماق ارقىلى» اتتى باعدارلاما بويىنشا ەلىمىزدەگى 100 اۋدان، قالانىڭ 700 وكىلى 35 ترەنينگكە قاتىسسا، 101 ادام حالىقارالىق كونفەرەنسيالاردا تاجىريبە جيناعان.
تۇركىستان وبلىسى اكىمىنىڭ باسپا ءسوز قىزمەتى
