قىزىلوردا وبلىسىنىڭ اكىمى قىرىمبەك كوشەربايەۆ پرەزيدەنتتىك، حالىقارالىق، رەسپۋبليكالىق پاندىك وليمپيادا، عىلىمي جوبا كونكۋرستارىنىڭ جۇلدەگەرلەرىمەن كەزدەستى.
ايماق باسشىسى ايتپاقشى بۇل وقۋشىلار ەلىمىزدىڭ اسىل ارمانى مەن ۇكىلى ۇمىتتەرى. راسىندا كەزدەسۋگە كەلگەن 93 وقۋشى ءوز قاتارلاستارىنىڭ الدى بولىپ، ءبىلىم باسەكەلەرىندە توپ جارىپ جۇرگەن ورەندەر.
بيىلعى جىلى وبلىسىمىزدىڭ دارىندى وقۋشىلارى قازاقستان، رەسەي، برازيليا، وڭتۇستىك كورەيا مەملەكەتتەرىندە وتكەن حالىقارالىق وليمپيادالارعا، عىلىمي جارىستارعا قاتىسىپ 46-سى جۇلدەلى ورىنداردى يەلەندى. سونىڭ ۇشەۋى التىن، 8ء-ى كۇمىس، قالعانى قولا جۇلدە.
رەسپۋبليكالىق پاندىك وليمپيادالار مەن عىلىمي جوبا كونكۋرستارىنا، پرەزيدەنتتىك وليمپياداعا قاتىسىپ 22 وقۋشى جەڭىمپاز اتاندى (التىن مەدال - 3، كۇمىس مەدال – 5، قولا مەدال - 14).
بيىلعى جىلى حالىقارالىق، رەسپۋبليكالىق وليمپيادالار مەن عىلىمي جارىستارعا قاتىسقان وقۋشىلاردىڭ 57ء-ى ۇبت-دەن بوساتىلدى. بىلتىرعى وقۋ جىلىندا سانكت-پەتەربۋرگ مەملەكەتتىك وسىمدىك پوليمەرلەرى تەحنولوگيالىق ۋنيۆەرسيتەتى، موسكۆا ۇلتتىق تەحنولوگيالىق زەرتتەۋ ۋنيۆەرسيتەتتەرىندە وبلىسىمىزدىڭ 107 بالاسى رەسەي فەدەراسياسى بيۋدجەتى ەسەبىنەن وقىتىلىپ جاتسا، وبلىس اكىمىنىڭ گرانتى بويىنشا 240 بالا بىلىمدەرىن شىڭداۋدا.
ال بيىل سانكت-پەتەربۋرگ مەملەكەتتىك وسىمدىك پوليمەرلەرى تەحنولوگيالىق ۋنيۆەرسيتەتىنە ەمتيحان تاپسىرعاندارىنىڭ ىشىندە 64 وقۋشى، ك.ا.تيميريازيەۆ اتىنداعى رەسەي مەملەكەتتىك اگرارلىق ۋنيۆەرسيتەتىنە 115 وقۋشى وقۋ گرانتىن يەلەنۋگە مۇمكىندىك السا، رەسەي فەدەراسياسى ماسكەۋ قالاسىنداعى ۇلتتىق تەحنولوگيالىق زەرتتەۋ ۋنيۆەرسيتەتىنە 200 وقۋشى، رەسەي فەدەراسياسى پرەزيدەنتى جانىنداعى شارۋاشىلىق جانە مەملەكەتتىك باسقارۋ اكادەمياسىنا 30 وقۋشى وقۋ گرانتىنا جانە 7 وقۋشى ماگيستراتۋرا مەن اسپيرانتۋراعا وقۋعا مۇمكىندىك الىپ وتىر.
- مۇنىڭ ءبارى – وبلىس كولەمىندە دارىندى بالالارعا دەگەن قامقورلىقتىڭ جانە سىزدەردىڭ، ۇستازدارىڭىز بەن اتا-انالارىڭىزدىڭ ەڭبەكتەرىنىڭ جەمىسى دەپ بىلەمىن. ەلىمىزدىڭ عىلىمي الەۋەتىن كوتەرىپ، حالىقارالىق دەڭگەيدە قازاق ەلىنىڭ عىلىمداعى مەرەيىن اسقاقتاتا دەپ سەنىم بىلدىرەمىن. قازاقتا «بىلەكتى – ءبىردى، ءبىلىمدى - مىڭدى جىعار» دەگەن اتالى ءسوز بار. بۇگىنگى كۇنى، سىزدەر، سول اتالى ۇستانىمنىڭ ۇدەسىنەن شىعىپ، ءتۇرلى ءبىلىم باسەكەلەرىندە قاتارلارىڭىزدان وزا شاۋىپ، ەل ابىرويىن اسقاقتاتۋىنا شىن جۇرەكتەن تىلەكتەسپىن، - دەدى وبلىس اكىمى ق.كوشەربايەۆ.
جالپى، كەزدەسۋ ەركىن فورماتتا ءوتتى. وقۋشىلار ايماق باسشىسىنا كوكەيلەرىندە جۇرگەن سۇراقتارىن قويدى. ءتىپتى ءوڭىردىڭ دامۋىنا بايلانىستى قانداي ماماندىق تاڭداۋ قاجەت دەپ كەڭەستە سۇرادى. بارلىق ساۋالدى وبلىس باسشىسى جاۋاپسىز قالدىرعان جوق. وقۋشىلار ونەر دە كورسەتتى.
كەزدەسۋ سوڭىندا بارلىق وقۋشىعا ارنايى سىيلىقتار تابىس ەتىلدى.
زەينوللا اباجانوۆ
