ءماجىلىس دەپۋتاتى اسحات ايماعامبەتوۆ سالىق كودەكسىنە قاتىستى ءبىرقاتار شيكىلىك بارىن ايتتى، - دەپ حابارلايدى Dalanews.kz.

دەپۋتاتتىڭ سوزىنشە، قازىرگى تاڭدا سالىق كودەكسىنىڭ جوباسى تالقىلاۋدا.

"جوبادا ازاماتتار ءۇشىن قولايسىز ءبىرقاتار نورمالار بار. ومىرلىك ماڭىزى بار تاۋارلار مەن قىزمەتتەردىڭ قىمباتتاۋىنا اكەلەتىنى تۋرالى وسى نورمالار بويىنشا قىزۋ پىكىرتالاس وتۋدە"، - دەيدى دەپۋتات.

ءبىرىنشىسى - ءبىلىم.

"كورپوراتيۆتىك سالىقتى ەنگىزۋ جەكە مەنشىك ۋنيۆەرسيتەتتەردىڭ، مەكتەپتەر مەن بالاباقشالاردىڭ باعاسىنىڭ وسۋىنە اكەلۋى مۇمكىن. كاسىپكەر ءوز پايداسىن قايتسە دە ساقتاپ قالۋعا تىرىسادى، سوندىقتان جاڭا سالىق ەنگىزىلسە، ول قىزمەتتىڭ قۇنىن ءوسىرۋ ارقىلى شەشىمىن تابۋى ابدەن ىقتيمال".

ەكىنشىسى - دارى-دارمەكتەر.

دارى-دارمەكتەر مەن ولاردىڭ وندىرىسىنە قاجەتتى ماتەريالداردى ققس (ندس) تولەۋدەن بوساتىلعان تاۋارلار تىزىمىنەن الىپ تاستاۋ ولاردىڭ قىمباتتاۋىنا الىپ كەلەدى. بۇل، اسىرەسە، تۇراقتى مەديسينالىق قولداۋدى قاجەت ەتەتىن ازاماتتارعا اۋىر تيەدى. زەينەتكەرلەر مەن مۇگەدەكتىگى بار ازاماتتارعا بۇل قيىندىق تۋدىرۋى مۇمكىن.

ءۇشىنشىسى - مەديسينالىق قىزمەتتەردىڭ قىمباتتاۋى.

مەديسينالىق قىزمەتتەرگە ققس ەنگىزۋ ولاردىڭ قىمباتتاۋىنا الىپ كەلۋى مۇمكىن.

"بۇل كودەكس قاراپايىم حالىققا قوسىمشا قارجىلىق جۇكتەمە اكەلمەۋى ءتيىس. سوندىقتان قاجەتتى تۇزەتۋلەردى ۇسىندىق"، - دەيدى ايماعامبەتوۆ.