ەندى جەكەمەنشىك مەكتەپكە كىمنىڭ ەسىمى بەرىلەتىنىن ونوماستيكالىق كوميسسيا شەشەدى. بۇل تۋرالى دەپۋتات اسحات ايماعامبەتوۆ ايتتى، دەپ حابارلايدى Dalanews.kz.
"زاڭ جوباسىنىڭ ماڭىزدى باعىتتارىنىڭ ءبىرى جەكەمەنشىك ءبىلىم بەرۋ ۇيىمدارىنا تۇلعالاردىڭ ەسىمىن بەرۋ جانە ونى وزگەرتۋ پروسەسىن ونوماستيكالىق كوميسسيامەن كەلىسىم ءتارتىبىن ەنگىزۋ. سوڭعى جىلدارى، وزدەرىڭىزگە بەلگىلى، جەكەمەنشىك ءبىلىم بەرۋ ۇيىمدارىنىڭ سانى كوبەيدى. سايكەسىنشە ولارعا ءتۇرلى تۇلعالاردىڭ ەسىمىن ەشقانداي رەسمي كەلىسىمسىز بەرۋ جيىلەپ كەتتى. كەيبىر وقيعالار قوعامدا رەزونانس تۋدىرعان بولاتىن.
ەندى جەكەمەنشىك ءبىلىم بەرۋ ۇيىمدارى تۇلعالاردىڭ ەسىمىن بەرمەس بۇرىن، وبلىستىق ونوماستيكالىق كوميسسيانىڭ رەسمي ماقۇلداۋىن الۋعا مىندەتتى بولادى. ياعني ولار مەملەكەتتىك ءبىلىم بەرۋ ۇيىمدارى سياقتى ونوماستيكالىق راسىمدەردەن وتەدى، دەيدى ايماعامبەتوۆ ءماجىلىستىڭ جالپى وتىرىسىندا.
