شەرزات ىسىنە قاتىستى سوتتا ايىپتالۋشىلاردىڭ قورعاۋشىلارى پروكۋرورعا قارسىلىق ءبىلدىردى. بۇل جاعدايعا ادۆوكات مەيىرمان شەكەيەۆ پىكىر ءبىلدىردى، - دەپ حابارلايدى Dalanews.kz.
"پروكۋرورعا قارسىلىق ءبىلدىرۋ قىلمىستىق-پروسەستىك كودەكستىڭ 88-بابىندا كورسەتىلگەن. 88-باپتا 87-باپقا سىلتەمە جاسالادى. ول جەردە قانداي جاعدايدا پروكۋرورعا قارسىلىق بىلدىرۋگە بولاتىنى تۋرالى تىزبەسى كورسەتىلگەن. ايىپتالۋشىلاردىڭ وكىلدەرىنىڭ بەرىپ وتىرعان نەگىزدەرى ول تالاپتارعا ساي ەمەس. ەموسيالىق جاعداي، باسقا دەگەن باپتا نەگىز بولىپ سانالمايدى. سوت بۇل قارسىلىقتى قاناعاتتاندىرمايدى دەپ ويلايمىز"، - دەدى ادۆوكات.
بۇگىن سوت وتىرىسىندا ايىپتالۋشى دارحان اسكەنتايدان جاۋاپ الۋ باستالدى. پروكۋرور دانا سارسەنباي ايىپتالۋشى دارحان اسكەنتايعا سۇراقتار قويىپ باستاعان كەزدە ونىڭ قورعاۋشىسى پروكۋرورعا قارسىلىق بىلدىرەتىنىن مالىمدەدى. بۇل قارسىلىقتى قورعاۋشى تاراپ قولدادى.
"ول (دانا سارسەنباي – ەسك.) سۇراقتاردى بۇرمالاپ قويىپ، ايىپتالۋشىعا قىسىم كورسەتىپ، داۋىس كوتەرىپ سويلەپ وتىر. ءبىز مەملەكەتتىك ايىپتاۋشىعا قارسىلىق بىلدىرەمىز"، – دەدى ادۆوكات ماۋلەن ەرجانوۆ.
