قازاقستاندا اكىمشىلىك قۇقىق بۇزۋشىلىق تۋرالى كودەكسىنە وزگەرتۋلەر ەنگىزۋ تۋرالى زاڭ جوباسى ازىرلەنۋدە. ونىڭ اياسىندا ايىپپۇل سانكسيالارىن بوساڭسىتۋ قاراستىرىلعان، – دەپ حابارلايدى قازاقپارات.

– كودەكس ىزگىلەندىرۋگە باعىتتالعان. وسى ورايدا كودەكستى قاتاڭداتۋدى كوزدەيتىن ەشبىر تۇزەتۋ ەسكەرىلمەگەن. ماسەلەن، مۇگەدەكتەرگە ارنالعان ورىنعا توقتاعانى ءۇشىن 50 اەك ەسكەرىلگەن، ياعني 110 مىڭ تەڭگەدەن استام. ونى كەم دەگەندە ەكى ەسەگە ازايتۋ ۇسىنىلۋدا. قوسىمشا قاراستىرىپ، بۇدان دا ارتىق قىسقارتۋىمىز مۇمكىن. ازىرگە، وسى ۇسىنىس قابىلداندى، – دەدى قوعامدىق تىڭداۋلار بارىسىندا قازاقستان رەسپۋبليكاسى زاڭناما ينستيتۋتىنىڭ ديرەكتورى اسلان تۇكييەۆ.

ايىپپۇل سوماسىن تومەندەتۋمەن قاتار، ءبىر جولعا ەسكەرتۋ شاراسىن ەنگىزۋ ۇسىنىلۋدا. تەك ەسكەرتۋدەن كەيىن عانا اكىمشىلىك ايىپپۇل سالىناتىن بولادى.

ق ر ادىلەت مينيسترلىگى زاڭناما دەپارتامەنتىنىڭ ديرەكتورى دارحان يگەمبايەۆ كودەكس 1700-دەن استام قۇقىق بۇزۋشىلىقتى قاراستىراتىنىن اتاپ ءوتتى.

– ءبىز ولاردىڭ بارلىعىن تالداپ شىقتىق. 300-گە تارتا باپ بويىنشا وزگەرتۋلەر ورىن الادى. ناقتىراق ايتقاندا، 150-دەن استام باپتا ايىپپۇلدى ازايتۋ ەسكەرىلگەن. وسى ماسەلە بۇگىندە تالقىلانىپ جاتىر. ەسكەرتۋ شاراسىن ەنگىزۋ 100-گە جۋىق باپتا ۇسىنىلدى، – دەدى ول. بەلگىلى بولعانداي، وزگەرتۋلەر 2018 جىلى ەنگىزىلۋى مۇمكىن.

دەرەككوزى: قازاقپارات