Magnum ساۋدا جەلىسىندە جۇمىس ىستەيتىن كۋرەردىڭ جۇمىستان شىعارىلۋى ەل ازاماتتارى اراسىندا كەڭىنەن تالقىلانۋدا. وسىعان بايلانىستى ساياساتتانۋشى جومارت سىمتىكوۆ ءوز كوزقاراسىن ءبىلدىرىپ، ماسەلەنى ساياسيلاندىرۋدىڭ ورىنسىز ەكەنىن اتاپ ءوتتى، دەپ حابارلايدى Dalanews.kz
كەلەڭسىز جاعداي ۇيگە زات اكەلگەن كۋرەردىڭ كليەنتتەن مەملەكەتتىك تىلدە سويلەۋدى تالاپ ەتۋىنەن كەيىن تۋىنداعان. الەۋمەتتىك جەلىلەردە سان الۋان پىكىرلەر ايتىلدى.
ساراپشىنىڭ پايىمداۋىنشا، بۇل جاعدايدىڭ ءتۇپ نەگىزى – جۇمىس بەرۋشى مەن قىزمەتكەر اراسىنداعى ەڭبەك قاتىناسى. ناقتىراق ايتساق، بۇل – جەكە ادامدار اراسىنداعى داۋ، ونى مەملەكەتتىڭ ءتىل ساياساتىنا تەلۋگە تىرىسۋ ارتىق.
«مۇنداي جاعدايلاردا ماسەلەنى ناقتى كونتەكستە قاراستىرۋ قاجەت. وسى وقيعادان ساياسي استار ىزدەۋدىڭ قاجەتى جوق. بۇل – ەڭبەك قاتىناستارى اياسىنداعى كەلىسپەۋشىلىك، ءارى ونىڭ شەشىمى دە وسى سالاداعى زاڭنامالار مەن كورپوراتيۆتىك ەرەجەلەر شەڭبەرىندە تابىلۋى ءتيىس»، – دەيدى جومارت سىمتىكوۆ.
ساراپشى ماسەلەنىڭ بىرنەشە ماڭىزدى اسپەكتىسىنە نازار اۋدارادى. بىرىنشىدەن، بيزنەس پەن قوعام اراسىنداعى سەنىم جانە الەۋمەتتىك جاۋاپكەرشىلىك ماسەلەسى. ءىرى كومپانيالار تەك پايدا تابۋدى عانا ەمەس، قوعام الدىنداعى مىندەتتەرىن دە ەستەن شىعارماۋى ءتيىس. بۇل اتالعان ساۋدا ورنىنا عانا ەمەس، بارلىق بيزنەس قۇرىلىمدارعا ورتاق تالاپ.
«بۇگىنگى تاڭدا كومپانيالاردىڭ قورشاعان ورتاعا، تۇتىنۋشىلاردىڭ قاۋىپسىزدىگىنە، قىزمەتكەرلەردىڭ ءال-اۋقاتىنا بەي-جاي قاراماي، جوعارى كاسىبي جانە ەتيكالىق ستاندارتتاردى ۇستانۋى وتە ماڭىزدى. قوعامدىق سەنىم دەگەنىمىز – ءبىر كۇندە قالىپتاسپايتىن، ءبىراق ءبىر وقيعامەن-اق شايقالۋى مۇمكىن قۇندىلىق»، – دەيدى ساراپشى.
ەكىنشىدەن، تۇتىنۋشىلاردىڭ قۇقىقتارىن قورعاۋ – بيزنەستىڭ باستى مىندەتتەرىنىڭ ءبىرى. تۇتىنۋشى – كەز كەلگەن كوممەرسيالىق قۇرىلىم ءۇشىن ەڭ ماڭىزدى تۇلعا. ولاردىڭ قاجەتتىلىكتەرى مەن قۇقىقتارى ۇنەمى ەسكەرىلىپ، ءونىم مەن قىزمەت ساپاسى سوعان ساي بولۋى قاجەت.
ۇشىنشىدەن، قوعامدىق پىكىردىڭ اسەرى مەن الەۋمەتتىك مەديانىڭ قۋاتى. ءبىر قاراعاندا، ءبىر مەكەمەدەگى قاراپايىم ەڭبەك داۋى بۇكىل ەلگە تارالىپ، قوعامدىق پىكىر تۋعىزدى. بۇل – قازىرگى اقپاراتتىق زاماننىڭ جاڭا قۇبىلىستارى.
«ءقازىر كەز كەلگەن ماسەلە، ءتىپتى لوكالدىق دەڭگەيدەگى وقيعا بولسىن، الەۋمەتتىك جەلىلەر ارقىلى بۇكىل قوعامعا تارالىپ، ۇلكەن رەزونانس تۋدىرا الادى. سوندىقتان ءىرى كومپانيالار مەن قوعامدىق ينستيتۋتتار مۇنداي جاعدايلارعا بارىنشا مۇقيات قاراپ، اشىق، ءارى ادىلەتتى شەشىم قابىلداۋى كەرەك»، – دەيدى جومارت سىمتىكوۆ.
ساياساتتانۋشى عالىمنىڭ پىكىرىنشە، وسىنداي جاعدايلاردا باستى نازاردى ساياسي جاعىنا بۇرمالاۋدىڭ ءجونى جوق. مۇنداي جايتتار قۇقىقتىق جانە كاسىبي تۇرعىدان شەشىم تابۋعا باعىتتالۋى كەرەك. قوعامدا سەنىمدى ساقتاۋ ءۇشىن ماسەلەنى ۋشىقتىرماي، كەرىسىنشە بايىپپەن، اشىق تۇردە شەشۋ ماڭىزدى.
مەرۋەرت رايىم
