«ءبىزدىڭ ءبىر تۇزەتۋىمىز بار. ول - اكىمشىلىك قاماۋدى 3 ساعاتتان 24 ساعاتقا ۇزارتۋ. بۇل ۋاقىتتا بۇزاقى ەسىن جيناپ، اشۋ-ىزاسى باسىلىپ، نە ىستەگەنىنە دۇرىس باعا بەرە الادى. ال ءۇش ساعاتتىڭ ىشىندە ول مۇمكىن ەمەس. سوسىن قورعاۋ نۇسقاماسى دەگەن بار. ونى ءبارىمىز بىلەمىز. سونى بۇزسا، كوبىنەسە، ىشكى ىستەر ورگاندارى ەسكەرتۋ جاساپ جاتادى. شىنىن ايتساق، سول ەسكەرتۋدى ەشكىم مەنسىنبەيدى. سوندىقتان ەسكەرتۋدىڭ ورنىنا ون تاۋلىككە اكىمشىلىك قاماۋ بولسا ەكەن دەيمىز. وسىنداي تۇزەتۋدى ءبىز جاقىندا پارلامەنتكە جىبەرمەكپىز»
- دەپ اتاپ كورسەتتى باس پروكۋرور جاقىپ اسانوۆ بۇگىن تۇرمىستىق زورلىق-زومبىلىق ماسەلەلەرىنە ارنالعان جيىندا.
ونىڭ ايتۋىنشا، جەتى جىلدان بەرى ەلىمىزدىڭ زومبىلىقتىڭ الدىن الۋ زاڭناماسىنا وزگەرىس ەنگىزىلمەگەن. ول ۋاقىتتىڭ ىشىندە ءبىرقاتار تەتىكتەر ەسكىرىپ قالدى. وسىعان بايلانىستى ارنايى زاڭ جوباسى ازىرلەنىپ جاتىر.
ايتا كەتەيىك، ءوز بايانداسىن تولىعىمەن مەملەكەتتىك تىلدە جاساعان جاقىپ اسانوۆ ءوز ومىرىنەن ءبىر وقيعا جايىندا بايانداپ بەردى. بۇدان بولەك، ناقتى ستاتيستيكانى كەلتىردى. ەلىمىزدە ايەلدەرگە قاتىستى قىلمىستاردىڭ سانى 90 پايىزعا ءوستى. ءاربىر ءۇشىنشى قىلمىس وتباسى جاعدايىندا بولدى. وتكەن جىلى 36 ايەل جانە ءبىر بالا قايتىس بولسا، 2 481 ايەل مەن 851 بالا زورلىق-زومبىلىقتىڭ قۇربانىنا اينالدى. 742 ايەل مەن كاسەلەتتىك جاسقا تولماعان 175 جاس وز-وزىنە قول سالدى. باس پروكۋروردىڭ ويىنشا، مەكتەپتە قاجەتسىز پاندەردىڭ ورنىنا ومىرگە پايدالى ءبىلىم بەرۋ كەرەك. سونىمەن قاتار اسانوۆ مىرزا ۇيلەنەمىن دەۋشىلەرگە ارنالعان مىندەتتى كۋرس ەنگىزۋدى ۇسىندى.
دەرەككوز: قازاقپارات
