ىلە الاتاۋىندا اتقان تاڭ وتە ەرەكشە: مۇندا ىلعال توپىراق ءيىسى مۇڭكىپ،  سامال جەل ەسەدى. كەشە عانا بوز جۋسان مەن قۋراعان ءشوپ باسقان باۋرايدا بۇگىندە شىرشا كوشەتتەرى ءتىزىلىپ تۇر. بۇل جاي عانا اعاش ەگۋ شاراسى ەمەس. بۇل – قازاقستانداعى ەڭ اۋقىمدى ەكولوگيالىق باستامالاردىڭ ءبىرى "Halyk ورمانى" جوباسىنىڭ باستاۋى.

جوبانىڭ ماقساتى – تابيعاتتى كوگالداندىرۋ عانا ەمەس، بۇل مەكەنگە جاڭا تىنىس بەرۋ. بەس جىلعا ەسەپتەلگەن جوباعا 1 ميلليارد تەڭگە بولىنگەن. وسى ۋاقىت ىشىندە ەلدىڭ ءۇش وڭىرىندە ءتورت ميلليوننان اسا اعاش وتىرعىزۋ جوسپارلانىپ وتىر.

العاشقى كەزەڭ شىعىس قازاقستانداعى سەمەي ورمانى اۋماعىندا باستالدى. ءبىر كەزدەرى ورتتەن جۇزدەگەن گەكتار جەر ورتەنگەن ايماققا بۇگىندە العاشقى 800 كوشەت ەگىلدى. ەندىگى كەزەك – ىلە الاتاۋى. مۇندا 5 گەكتار اۋماققا 14 مىڭ شرەنك شىرشاسى وتىرعىزىلماق.

ىلە الاتاۋى مەملەكەتتىك ۇلتتىق تابيعي پاركىنىڭ باس ديرەكتورى ەلنۇر احمەتوۆتىڭ ايتۋىنشا، ايتۋلى ءىس-شاراعا بەس جۇزدەن اسا ادام جينالعان.

"بۇگىن 1 گەكتار جەرگە 625 شىرشا اعاشى وتىرعىزىلادى. اعاشتار ارنايى ءتالىمباقتا وسىرىلگەن. 1 مەترگە دەيىنگى شىرشا اعاشتارى وتىرعىزىلادى. شىرشا - ىلە الاتاۋىندا بۇرىننان ءوسىپ كەلە جاتقان رەليكتى اعاش"، - دەدى ول.

ەكولوگيا جانە تابيعي رەسۋرستار ۆيسە-مينيسترى نۇربەك شاربييەۆ بۇل جوباعا قىسقا، ءبىراق ناقتى سيپاتتاما بەردى.

"تابيعاتتى قورعاۋ – ءىس-شارا ەمەس، مادەنيەت. ءبىز تابيعاتقا جاناشىرلىق تانىتپايىنشا، ەكونوميكالىق ءوسىم دە ۇزاققا بارمايدى. "Halyk ورمانى" جانە وسىنداي جوبالار – ەكولوگيالىق مادەنيەتتى ءومىرىمىزدىڭ تابيعي بولىگىنە اينالدىرۋ جولىنداعى ماڭىزدى قادام".

ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ رەكتورى مەيرام بەگەنتايەۆ ءۇشىن بۇل جوبا ەسەپ ەمەس، بولاشاق ەكەنىن جەتكىزدى.

"ءار وتىرعىزىلعان اعاش – قالانىڭ تىنىسىنا، ادامنىڭ ساناسىنا سالىنعان ينۆەستيسيا. "Halyk ورمانى" – تابيعاتتى ايالاۋ مادەنيەتىن قالىپتاستىراتىن مەكتەپ. بۇل – بىزدەن كەيىن دە ەل ەسىندە قالاتىن ءىس".