Ile Alataýynda atqan tań óte erekshe: munda ylǵal topyraq iisi múńkip, samal jel esedi. Keshe ǵana boz jýsan men qýraǵan shóp basqan baýraida búginde shyrsha kóshetteri tizilip tur. Bul jai ǵana aǵash egý sharasy emes. Bul – Qazaqstandaǵy eń aýqymdy ekologiialyq bastamalardyń biri "Halyk ormany" jobasynyń bastaýy.
Jobanyń maqsaty – tabiǵatty kógaldandyrý ǵana emes, bul mekenge jańa tynys berý. Bes jylǵa eseptelgen jobaǵa 1 milliard teńge bólingen. Osy ýaqyt ishinde eldiń úsh óńirinde tórt millionnan asa aǵash otyrǵyzý josparlanyp otyr.
Alǵashqy kezeń Shyǵys Qazaqstandaǵy Semei ormany aýmaǵynda bastaldy. Bir kezderi órtten júzdegen gektar jer órtengen aimaqqa búginde alǵashqy 800 kóshet egildi. Endigi kezek – Ile Alataýy. Munda 5 gektar aýmaqqa 14 myń Shrenk shyrshasy otyrǵyzylmaq.
Ile Alataýy memlekettik ulttyq tabiǵi parkiniń bas direktory Elnur Ahmetovtiń aitýynsha, aitýly is-sharaǵa bes júzden asa adam jinalǵan.
"Búgin 1 gektar jerge 625 shyrsha aǵashy otyrǵyzylady. Aǵashtar arnaiy tálimbaqta ósirilgen. 1 metrge deiingi shyrsha aǵashtary otyrǵyzylady. Shyrsha - Ile Alataýynda burynnan ósip kele jatqan relikti aǵash", - dedi ol.
Ekologiia jáne tabiǵi resýrstar vitse-ministri Nurbek Shárbiev bul jobaǵa qysqa, biraq naqty sipattama berdi.
"Tabiǵatty qorǵaý – is-shara emes, mádeniet. Biz tabiǵatqa janashyrlyq tanytpaiynsha, ekonomikalyq ósim de uzaqqa barmaidy. "Halyk ormany" jáne osyndai jobalar – ekologiialyq mádenietti ómirimizdiń tabiǵi bóligine ainaldyrý jolyndaǵy mańyzdy qadam".
Sátbaev atyndaǵy Qazaq ulttyq tehnikalyq ýniversitetiniń rektory Meiram Begentaev úshin bul joba esep emes, bolashaq ekenin jetkizdi.
"Ár otyrǵyzylǵan aǵash – qalanyń tynysyna, adamnyń sanasyna salynǵan investitsiia. "Halyk ormany" – tabiǵatty aialaý mádenietin qalyptastyratyn mektep. Bul – bizden keiin de el esinde qalatyn is".
