بىلتىر اۋىلدىق جەرلەرگە جۇمىس ىستەۋگە بارعان قازاقستاندىق دارىگەرلەردىڭ 30 پايىزىنا كوتەرمە اقى تولەنبەگەن. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا مالىمدەدى، دەپ حابارلايدى Dalanews.kz.
اۋىلعا قونىس اۋدارىپ، جۇمىسقا ورنالاسقان اسا تاپشى ماماندىقتارداعى دارىگەرلەرگە 8،5 ميلليون تەڭگەگە دەيىن كوتەرمە اقى بەرىلۋى ءتيىس. الايدا ءمينيستردىڭ ايتۋىنشا، 2024 جىلى وسىنداي تولەمدى دارىگەرلەردىڭ ۇشتەن ءبىرى الا الماعان.
“بىلتىر اۋىلدىق جەرلەرگە 370 جاس مامان جۇمىسقا ورنالاستى. الايدا ولاردىڭ تەك 254ء-ى عانا (70%) كوتەرمە اقى الدى. اقمولا، جامبىل، باتىس قازاقستان جانە اباي وبلىستارىندا ءولىم-جىتىم دەڭگەيى جوعارى بولعانىنا قاراماستان، بۇل قولداۋ قاراستىرىلماعان”، – دەدى مينيستر ۇكىمەت وتىرىسىندا.
ءوز كەزەگىندە پرەمەر-مينيستر ولجاس بەكتەنوۆ اۋىلعا بارعان جاس دارىگەرلەرگە بارلىق وڭىردە كوتەرمە تولەمدى تولىق قامتاماسىز ەتۋ قاجەت ەكەنىن قاداپ ايتتى.
