اۋديتورلار قازاقستاندا 1،1 ملرد تەڭگە ءتيىمسىز جۇمسالعانىن انىقتادى، دەپ حابارلايدى Dalanews.kz.
اۋديت ماتەريالدارىندا كورسەتىلگەندەي، 2016-2017 جىلدارى «يننوۆاسيالىق تەحنولوگيالار پاركى» اكق شەڭبەرىندە 5 تەحنولوگيالىق دامۋ ورتالىعىن جانە 1 ۆەنچۋرلىك قوردى قۇرۋعا بيۋدجەتتەن 4،9 ملرد تەڭگە بولىنگەن. ناتيجەسىندە 3 ورتالىقتىڭ قىزمەتى ءتيىمسىز جانە ناتيجەسىز بولىپ شىقتى، 2 كومپانيا پەرسپەكتيۆالىق دامۋ جوسپارلارىنسىز جۇمىس ىستەيدى. وسىلايشا، 3 ملرد تەڭگە ءتيىمسىز پايدالانىلعان.
«يننوۆاسيالىق تەحنولوگيالار پاركى» اكق ارقىلى بيۋدجەت ەسەبىنەن 987 ملن تەڭگەدەن استام سوماعا قارجىلاندىرىلعان 95 ستارتاپقا سالىنعان ينۆەستيسيالاردىڭ ناتيجەلىلىگى مەن تابىستىلىعى راستالماي وتىر. بۇل رەتتە 2018-2020 جىلدارى قارجىلاندىرىلعان 32 ۇيىم تاراتىلعان، ونىڭ 18ء-ى ماجبۇرلەۋ تارتىبىمەن تاراتىلعان. تاعى 21 كومپانيا نولدىك سالىق ەسەپتىلىگىمەن جۇمىس ىستەيدى، بۇل قىزمەتتىڭ جوقتىعىن كورسەتكەن.
«يننوۆاسيالىق تەحنولوگيالار پاركى» اكق-عا 2015 جىلدان 2024 جىلعا دەيىن بيۋدجەت قاراجاتىنان بولەك جەر قويناۋىن پايدالانۋشىلاردان عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردى (عزتكج) قارجىلاندىرۋ بويىنشا مىندەتتەمەلەر رەتىندە 41 ملرد تەڭگە تۇسكەن. بۇل رەتتە «يننوۆاسيالىق تەحنولوگيالار پاركى» اكق ساراپتامالىق كوميسسياسى عزتكج-نى قامتاماسىز ەتۋگە جاۋاپ بەرمەيدى، بۇل وسى باعىتتا قابىلداناتىن شەشىمدەردىڭ اشىقتىعى مەن بىرتەكتىلىگىنە كۇمان كەلتىرەدى. ناتيجەسىندە 14،8 ملرد تەڭگەگە 179 جوبا نەگىزىنەن بيزنەستىڭ اعىمداعى مىندەتتەرىن شەشۋگە باعىتتالعان، ال عىلىمدى دامىتۋعا جانە جاڭا تەحنولوگيالاردى جاساپ شىعارۋعا ىقپال ەتپەگەن.
جالپى اۋديت قورىتىندىسى بويىنشا 1،1 ملرد تەڭگەگە قارجىلىق بۇزۋشىلىقتار انىقتالدى. بيۋدجەت قاراجاتى مەن اكتيۆتەرىن ءتيىمسىز جوسپارلاۋ 2،2 ملرد تەڭگە، ال ولاردى ءتيىمسىز پايدالانۋ 46،5 ملرد تەڭگە بولدى.
سونداي-اق 45 جۇيەلىك كەمشىلىكتەر مەن 143 پروسەدۋرالىق بۇزۋشىلىقتار انىقتالدى.
