اۋديتورلار ماڭعىستاۋ جانە تۇركىستان وبلىستارىندا قارىز قاراجاتىن پايدالانۋ كەزىندە جول بەرىلگەن زاڭبۇزۋشىلىقتاردى انىقتادى، - دەپ حابارلايدى Dalanews.kz.
تەكسەرۋ كوميسسيالارى ماڭعىستاۋ جانە تۇركىستان وبلىستارىندا بيۋدجەتتىك كرەديتتەر مەن حالىقارالىق قارجى ۇيىمدارىنىڭ قارىز قاراجاتىن ءتيىمسىز جانە ماقساتسىز پايدالانۋ دەرەكتەرىن انىقتادى. وڭىرلەردە مەملەكەتتىك بورىشتى جانە كۆازيمەملەكەتتىك سەكتوردىڭ جەكەلەگەن سۋبەكتىلەرىنىڭ بورىشىن باسقارۋ اۋديتتەرى جوعارى اۋديتورلىق پالاتانىڭ تاپسىرماسى بويىنشا جۇرگىزىلدى.
قارىز قاراجاتى تارتىلعان ينفراقۇرىلىمدىق وبەكتىلەردى، تۇرعىن ۇيلەردى سالۋ جانە جاڭعىرتۋدا ناتيجەنىڭ بولماۋى فاكتىلەرى انىقتالدى. جەكەلەگەن جاعدايلاردا تارتىلعان قارىزدار سالىم بويىنشا پايىزدار تۇرىندە قوسىمشا كىرىس الۋ ءۇشىن دەپوزيتتەرگە سالىنعان، بۇل قاراجاتتى ماقساتقا ساي پايدالانباۋعا اكەپ سوقتى.
اۋديت ناتيجەلەرى بويىنشا وسى وڭىرلەردە قارىز قاراجاتىن پايدالانۋ تيىمدىلىگىنە، سونداي-اق كرەديتتىك مىندەتتەمەلەردى ۋاقىتىلى وتەۋگە جەتكىلىكتى باقىلاۋ جاسالماعانى اتاپ ءوتىلدى.
اۋديتورلار ماڭعىستاۋ وبلىسىندا 5،5 ملرد تەڭگەگە قارجىلىق بۇزۋشىلىقتار، 869 ملن تەڭگەگە سىرتقى قارىزدى ءتيىمسىز جوسپارلاۋ جانە پايدالانۋ، 6،7 ملرد تەڭگەگە بيۋدجەتتىك كرەديتتى ءتيىمسىز پايدالانۋ فاكتىلەرىن انىقتادى.
وڭىردە 2 لاۋازىمدى تۇلعا اكىمشىلىك جاۋاپكەرشىلىككە تارتىلىپ، ولارعا 3،3 ملن تەڭگە ايىپپۇل سالىندى.
تۇركىستان وبلىسىندا اۋديت قورىتىندىسى بويىنشا 10،5 ملن تەڭگەگە قارجىلىق بۇزۋشىلىقتار، 4،8 ملرد تەڭگەگە بيۋدجەت قاراجاتى مەن اكتيۆتەردى ءتيىمسىز پايدالانۋ انىقتالدى.
