قازاق قوعامىندا اقساقالدار – ەلدىك پەن ونەگەلى ءومىر تاجىريبەسىنىڭ قاينار كوزى. قارتتار قاشاندا ەلدى بەرەكە-بىرلىككە، ىرىس-ىنتىماققا جۇمىلدىرا بىلگەن. حالىقتىڭ "اۋىلىڭدا قارتىڭ بولسا، جازىپ قويعان حاتپەن تەڭ"، "قارياسى بار ەلدىڭ – قازىناسى بار" دەگەن سوزدەرىنىڭ ءمانىسى – اقىلدىڭ كەنى، قازىنالى قارتتاردى قۇرمەتتەۋ، اقساقالدار قاۋىمىن ارداقتاۋ بولىپ تابىلادى.



1 قازان – قارتتار كۇنىنە وراي، ورداباسى اۋدان اكىمى راشيد قايىپجانوۆ شىمكەنتتەگى №5 ارناۋلى الەۋمەتتىك قىزمەتتەر كورسەتۋ ورتالىعىنا بارىپ، جالعىزدىقتىڭ تاۋقىمەتىن كوتەرگەن قاريالاردى مەرەكەمەن قۇتتىقتادى. سونىمەن قاتار، قارتتار ءۇيى ۇجىمىنا شىنايى العىسىن جەتكىزىپ، سىي-سياپات جاسادى.

– ەلباسىمىز نۇرسۇلتان ءابىش ۇلى نازاربايەۆتىڭ بۇل سالاداعى ساياساتىن باسشىلىققا الا وتىرىپ، ارداگەرلەرىمىزدى ارداقتاپ، قۇرمەتتەۋگە ءارقاشاندا دايىنبىز. سىزدەردى الەۋمەتتىك جاعىنان قولداۋدىڭ ءتيىمدى تاسىلدەرىن بۇدان كەيىن دە جۇزەگە اسىرا بەرەمىز، – دەدى اۋدان باسشىسى ءوز قۇتتىقتاۋىندا.