اتىراۋ وبلىسىنا جۇمىس ساپارىمەن كەلگەن «قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ» ديرەكتورى، مەديسينا عىلىمدارىنىڭ دوكتورى، پروفەسسور، ۇلتتىق عىلىم اكادەمياسىنىڭ اكادەميگى ديليارا قايداروۆا اتىراۋ وبلىسى اكىمىنىڭ ورىنباسارى باقىتگۇل حامەنوۆانىڭ قاتىسۋىمەن وتكەن ۇيلەستىرۋ كەڭەسى وتىرىسىندا اتىراۋدا سوڭعى ءتورت جىلدا ونكولوگيالىق اۋرۋدىڭ تىركەلۋ ديناميكاسىندا باسەڭدەۋ بارىن اتاپ ءوتتى.
– وڭ كورسەتكىش سوڭعى جىلدارى سالانىڭ 26 كادرمەن تولىعۋىنا دا بايلانىستى. بۇرىن ناۋقاستار ەم الۋ ءۇشىن الماتىعا كەلىپ قارالاتىن بولسا، قازىرگى ۋاقىتتا ونكولوگيالىق اۋرۋعا شالدىققان ەمدەلۋشىلەرگە جوعارى ساپالى كومەك جەرگىلىكتى مەديسينالىق ورىنداردا دا كورسەتىپ وتىر. اتىراۋدىڭ مەديسينالىق مەكەمەلەرى سوڭعى ۇلگىدەگى قۇرىلعىلارمەن جابدىقتالعان. جانە حيرۋرگيالىق كۇردەلى وتا جاساۋعا دا مۇمكىندىكتەر بار، – دەپ اتاپ ءوتتى ول.
اتىراۋ وبلىسى دەنساۋلىق ساقتاۋ باسقارماسى باسشىسى اسحان بايدۋالييەۆتىڭ ايتۋىنشا، اتىراۋدا ءسۇت بەزى، وكپە وبىرى، اسقازاننىڭ قاتەرلى ىسىگى اۋرۋلارى ءجيى كەزدەسەدى.
– سول سەبەپتى، مەديسينالىق مەكەمەلەر ەرتە مەرزىمدە دياگنوستيكادان وتكىزىپ، زەرتتەۋگە مۇمكىندىك بەرەتىن جانە كۇردەلى وتا جاسالاتىن قۇرىلعىلارمەن جابدىقتالعان. دەسە دە، وبلىستاعى باستى ونكولوگيالىق ديسپانسەر عيماراتىنىڭ كونە ەكەنى راس. بۇگىنگى تاڭدا وسى ماسەلەگە بايلانىستى ايماق باسشىسىنا ۇسىنىس دايىندالۋدا، – دەدى اتىراۋ وبلىسى دەنساۋلىق ساقتاۋ باسقارماسى باسشىسى اسحان بايدۋالييەۆ.
اتاپ وتەرلىگى، اتىراۋ وبلىسىندا بارلىق مەديسينالىق مەكەمەلەر ورتاق جۇيەگە قوسىلدى. بۇل جۇيە قالا، اۋداندارداعى توموگرافيا، رەنتگەندىك زەرتتەۋلەردىڭ قورىتىندىلارىن ورتاق بازادا جيناقتاپ، زەردەلەۋگە مۇمكىندىك بەرەدى. جانە قاتەرلى ىسىكتەردى بۇگىندە اتىراۋدا جاساندى ينتەللەكت كومەگىمەن انىقتاۋعا مۇمكىندىك جاسالعاندىعى ايماق مەديسيناسى ءۇشىن ۇلكەن جاڭالىق.
– جاساندى ينتەللەكت قاتەرلى ىسىكتەردى مەيىلىنشە ەرتە مەرزىمدە انىقتاۋعا مۇمكىندىك بەرەدى. ءبىز وبىرعا شالدىققان ناۋقاستىڭ ءومىر ءسۇرۋ ۇزاقتىعىن كەمىندە 5-6 جىلعا سوزا الساق، مۇنىڭ ءوزى ۇلكەن جەتىستىك، – دەپ ناقتىلادى اتىراۋ وبلىسى دەنساۋلىق ساقتاۋ باسقارماسى باسشىسى اسحان بايدۋالييەۆ.
قازاقستاننىڭ باس ونكولوگ دارىگەرى ديليارا قايداروۆانىڭ ايتۋىنشا، ونكولوگيالىق اۋرۋلاردى انىقتاۋدىڭ ەڭ ءتيىمدى جولى – مەديسينالىق سكرينينگ. قاتەرلى ىسىك ەرتە انىقتالعان جاعدايدا ماماندار ناۋقاسقا 70-80 پايىزعا دەيىن كومەك كورسەتە الادى. «سول ءۇشىن دە ازاماتتاردى ءوز دەنساۋلىعىنا سالعىرت قاراماۋعا، مەديسينالىق سكرينينگتەن ۋاقتىلى وتۋگە شاقىرامىن» دەگەن باس ونكولوگ دارىگەر ەمحانالارداعى سكرينينگتىك تەكسەرۋلەردى ۇيىمداستىرۋ جۇمىستارىن جوعارى دەڭگەيدە اتقارۋدى تاپسىردى.
ەسكە سالا كەتەلىك، قازاقستاندا قاتەرلى سىرقاتقا قارسى سكرينينگتىك تەكسەرۋلەر 25 جاستان باستالادى.
ايەلدەر اراسىندا جاتىر مويىنى وبىرىنا قارسى تەكسەرۋ 30-35 جاستا، ءسۇت بەزى وبىرىنا قارسى تەكسەرۋ 50-60 جاس ارالىعىندا، ەرلەر اراسىندا قۋىق بەزى وبىرىنا قارسى مەديسينالىق سكرينينگ 50-54، 58-62 جاس ارالىعىندا وتكىزىلەدى.
اسقازان، وڭەش وبىرىنا قارسى تەكسەرۋ ەر، ايەل ادامدار ءۇشىن دە 50 جاستان باستالادى. ال، باۋىر وبىرىنا قارسى تەكسەرۋدەن پاسيەنت كەز كەلگەن جاستا وتە الادى.
اتىراۋ وبلىسىندا ونكولوگيالىق ەسەپتە 4500 ناۋقاس تۇر. سوڭعى ءبىر جىلدا قاتەرلى ىسىك 1150 ادامنان انىقتالعان.
اتىراۋ وبلىسىنا جۇمىس ساپارى اياسىندا قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ماماندارى اتىراۋ وبلىستىق ونكولوگيالىق ديسپانسەرىنە ارنايى بارىپ ونداعى ناۋقاستاردى ەمدەۋ بويىنشا كونسۋلتاسيالىق كەڭەستەر بەردى جانە جەرگىلىكتى دارىگەرلەر ءۇشىن شەبەرلىك ساباقتارىن وتكىزدى.
ايدىن كاكيموۆ، اتىراۋ وبلىسى.
