اتىراۋ وبلىسىنداعى جانگەلدين اۋىلىندا جوعالعان وتباسىعا قاتىستى قىلمىس اشىلدى، دەپ حابارلايدى Dalanews.kz.
2025 جىلى جەلتوقساندا پوليسياعا 66 جاستاعى ەر ادام، 64 جاستاعى ايەل، سونداي-اق، ولاردىڭ بالالارى - 32 جاستاعى ۇلى مەن 35 جاستاعى قىزى حابار-وشارسىز كەتكەنى تۋرالى حابارلاما تۇسكەن.
تۋىستارىنىڭ ايتۋىنشا، وتباسى قاراشادان بەرى بايلانىسقا شىقپاعان. تورتەۋى دە جوعالىپ كەتكەن ادامدار رەتىندە ىزدەۋ جاريالاندى. بۇل دەرەك بويىنشا سوتالدى تەرگەپ-تەكسەرۋ باستالىپ، جەدەل-تەرگەۋ توبى قۇرىلدى.
"بىلتىر جەلتوقساننىڭ اياعىندا اتىراۋ قالاسىنىڭ تۇرعىنى پوليسياعا حابارلاسىپ، اعاسى مەن ونىڭ وتباسى ۇزاق ۋاقىت بويى بايلانىسقا شىقپاي جۇرگەنىن ايتتى. جۇرگىزىلگەن جەدەل تەرگەۋ ءىس-شارالارى ناتيجەسىندە ولتىرىلگەن ادامداردىڭ مايىتتەرى ءارتۇرلى جەرلەردەن كومىلگەن كۇيدە تابىلدى"، - دەدى ق ر ءىىم كريمينالدىق پوليسيا دەپارتامەنتىنىڭ باستىعى قانات نۇرماعامبەتوۆ.
6 قاڭتاردا تەرگەۋ بارىسىندا سارايدىڭ ىشىنەن ەرلى-زايىپتىنىڭ ءمايىتى تابىلدى. وسىدان كەيىن ءىس ادام ءولتىرۋ دەرەگى بويىنشا قايتا سارالانىپ، بالالاردى ىزدەستىرۋ جۇمىستارى جالعاستى. قىلمىس جاسادى دەگەن كۇدىكپەن 29 جاستاعى ەر ادامعا، ياعني وسى وتباسىنىڭ بۇرىنعى كۇيەۋ بالاسىنا حالىقارالىق ىزدەۋ جاريالاندى. ونىمەن بىرگە ەرلى-زايىپتىنىڭ كىشى قىزىنا دا حالىقارالىق ىزدەۋ جاريالاندى. بۇرىن ول كۇدىكتىمەن نەكەدە تۇرعان.
"ىشكى ىستەر مينيسترلىگىنىڭ قىزمەتكەرلەرى يندونەزيا رەسپۋبليكاسىنداعى شەتەلدىك ارىپتەستەرىمەن بىرلەسىپ، وسى ەلدىڭ ارالدارىنىڭ بىرىندە اتىراۋ وبلىسىنداعى قىلمىسقا قاتىستى كۇدىكتىنى ۇستادى. ءقازىر ول قازاقستانعا دەپورتاسيالانىپ، ۋاقىتشا ۇستاۋ يزولياتورىنا قامالدى"، - دەدى ق ر ءىىم كريمينالدىق پوليسيا دەپارتامەنتىنىڭ باستىعى قانات نۇرماعامبەتوۆ.
كۇدىكتى يندونەزيادا ۇستالعان. ونىمەن بىرگە وتباسىنىڭ كىشى قىزى دا انىقتالعان. ۇستالعاننان كەيىن ەر ادام كىناسىن مويىنداعان. ونىڭ كورسەتۋىمەن جەدەل تەرگەۋ توبى قوسىمشا تەرگەۋ جۇرگىزدى. اتىراۋداعى ءۇي اۋلاسىن تەكسەرۋ بارىسىندا بۇعان دەيىن حابار-وشارسىز كەتكەن ۇل مەن قىزدىڭ مايىتتەرى تابىلعان.
"قىلمىسقا ۇزاق ۋاقىتقا سوزىلعان تۇرمىستىق جانجال سەبەپ بولعان. تەرگەۋ ەكى جانە ودان دا كوپ ادامدى ءولتىرۋ بابى بويىنشا جۇرگىزىلىپ جاتىر، بۇل ءىس مينيسترلىكتىڭ باقىلاۋىندا"، - دەدى قانات نۇرماعامبەتوۆ.
ءقازىر تەرگەۋ جالعاسىپ جاتىر جانە ەرەكشە باقىلاۋدا. سونداي-اق، وتباسىنىڭ كىشى قىزىنىڭ بۇل ىسكە قاتىسى بار-جوعى تەكسەرىلىپ جاتىر. پسيحيكالىق جاعدايىن انىقتاۋ ماقساتىندا ول سوت-پسيحياتريالىق ساراپتاما جۇرگىزۋ ءۇشىن مەديسينالىق ۇيىمعا جىبەرىلگەن.
