27-28 مامىر جۇڭگو استاناسى بەيجىڭدە «اتامەكەن» ۇكپ باسقارما ءتوراعاسى رايىمبەك باتالوۆ باستاعان دەلەگاسيا ينۆەستيسيا جارمەڭكەسىن ارالادى.
جارمەڭكەنىڭ ءاربىر سەسسياسى ءبىر الاڭدا 96 مەملەكەت پەن 2،2 مىڭ كاسىپكەردى بىرىكتىرەدى.

اتالمىش جارمەڭكەدە جاڭا جاھاندىق دامۋ مۇمكىندىكتەرى مەن ينۆەستيسيالىق جوسپاردى ازىرلەۋگە باسىمدىق بەرىلگەن. دالىرەك ايتساق، ايماقتىق ىنتىماقتاستىققا، ءوندىرىس ورىندارىن بايلانىستىرۋعا، تەحنولوگيالىق يننوۆاسيالارعا، جاسىل جوبالارعا جانە جاساندى ينتەللەكت الەۋەتىنە باسا نازار اۋدارىلعان.

«ءبىر بەلدەۋ، ءبىر جول» جوباسىنىڭ سەرىكتەسى رەتىندە قازاقستان رەسپۋبليكاسىن بۇل الاڭدا ەرەكشە ىلتيپاتپەن قارسى الدى.

«جۇڭگو مەن ەۋرازيا ايماعى اراسىنداعى جاڭا ينۆەستيسيالىق دامۋ» سەسسياسىندا ءسوز سويلەگەن رايىمبەك باتالوۆ قازاقستان-قىتاي ىنتىماقتاستىعىنىڭ جوعارى كورسەتكىشتەرى تۋرالى باياندادى.
وتكەن جىلدىڭ سوڭىندا قوس ەل ەكىجاقتى ساۋدا كولەمىن 30 پايىزعا ارتتىرىپ، 31،5 ميلليارد دوللارلىق جەتىستىككە جەتىپ، تاريحي رەكوردتى جاڭارتتى.

سونداي-اق، ۇكپ ءتوراعاسى سەسسياعا قاتىسۋشىلاردى قازاقستان ەكونوميكاسىنىڭ دامۋىنىڭ نەگىزگى باعىتتارىمەن جانە ونىڭ ارتىقشىلىقتارىمەن تانىستىردى. اتاپ ايتقاندا:
-اتوم ەنەرگياسىنىڭ جانە جاڭارتىلاتىن ەنەرگيا كوزدەرىنىڭ الەۋەتى؛
-گاز تاسىمالداۋ جۇيەسىن كەڭەيتۋ؛
-وڭدەۋشىلەرگە جەڭىلدەتىلگەن باعامەن مەتالداردى تەرەڭ وڭدەۋ.
سونداي-اق، قازاقستان سىرتقى ساۋدا پالاتاسىنىڭ ءتوراعاسى مۇرات قارىمساقوۆتىڭ مالىمەتى بويىنشا ەلىمىزدىڭ بارلىق ينۆەستيسيالىق مۇمكىندىكتەرىن تانىستىرۋ ماقساتىندا قىتايداعى كاسىپكەرلەرمەن، ءىرى قورلاردىڭ جانە ۇلتتىق كومپانيالاردىڭ وكىلدەرىمەن كەزدەسۋلەر ءوتتى.

ناتيجەسىندە HENAN ZHENGZHOU MINING MACHINERY CO.، LTD كومپانياسى تاۋلىگىنە 200 توننا اك شىعاراتىن پەشتى تۇلكىباس اك زاۋىتىنا ساتىپ الۋ جانە ونى ودان ءارى جاڭعىرتۋ تۋرالى كەلىسىمگە كەلدى.

ودان سوڭ رايىمبەك ءانۋار ۇلى جارمەڭكەنى ۇيىمداستىرعان Chinese Overseas Development Association (CODA) ءتوراعاسى حە چجەنۆەيمەن كەزدەستى.

ايتا كەتەيىك، بۇل رايىمبەك باتالوۆ پەن حە چجەنۆەيدىڭ ءبىرىنشى كەزدەسۋى ەمەس. بىلتىر تامىز ايىندا «اتامەكەن» ۇكپ ەكىجاقتى ينۆەستيسيالار ءۇشىن ءوزارا جاعداي جاساۋعا ارنالعان ىنتىماقتاستىق تۋرالى مەموراندۋمعا قول قويعان بولاتىن.

ەلىمىزدىڭ اتالمىش ينۆەستيسيالىق جارمەڭكەگە قاتىسۋى قىتايلىق ينۆەستورلاردىڭ قازاقستانعا دەگەن قىزىعۋشىلىعىنىڭ ارتىپ كەلە جاتقانىن كورسەتەدى.