شاراعا مادەنيەت جانە سپورت ءمينيسترى اسحات ورالوۆ، زيالى قاۋىم وكىلدەرى ولجاس سۇلەيمەنوۆ، سماعۇل ەلۋباي، تورەگەلدى شارمانوۆ، باقىتجان قاناپيانوۆ جانە اقىن-جازۋشىلار مەن مەملەكەت جانە قوعام قايراتكەرلەرى قاتىستى.
مينيستر مۇرات اۋەزوۆتى مەرەيتويىمەن قۇتتىقتاي وتىرىپ، ۇلت ابىزدارىنىڭ عۇمىر جولى جاس ۇرپاق ءۇشىن قاشاندا ۇلگى-ونەگە ەكەنىن اتاپ ءوتتى.
– ءوزىڭىز سياقتى زامانا تۋدىرعان زاڭعارلارىمىز كوپ ەمەس. سىزدەردىڭ ونەگەلى ءومىر جولدارىڭىز وسكەلەڭ جاس بۋىنعا قاشاندا تەمىرقازىق بولۋى قاجەت. ەگەمەن ەلدىڭ ەڭسەسىن تىكتەپ، تاۋەلسىزدىككە تۇعىر بولدىڭىز. ءبىز ءوز كەزەگىمىزدە، سىزدەر سالعان سول تاعىلىمدى تانىم جولىمەن جارقىن بولاشاققا ايقىن باعىت ۇستانۋىمىز كەرەك. ءالى دە شىعارماشىلىعىڭىزدان قول ۇزبەي، سۇبەلى دە سۇيەكتى ەڭبەكتەرىڭىزبەن حالىق قازىناسىن مولايتا بەرىڭىز، – دەدى اسحات ورالوۆ ءوزىنىڭ قۇتتىقتاۋ سوزىندە.
سونىمەن قاتار، زيالى قاۋىم وكىلدەرى اسحات ورالوۆتى مادەنيەت جانە سپورت ءمينيسترى قىزمەتىنە تاعايىندالۋىمەن قۇتتىقتادى.
– بۇگىن وسىنداي كەزدەسۋدە جاڭا مادەنيەت جانە سپورت ءمينيسترى اسحات ورالوۆتى قارسى الامىز. مەن ءبىرىنشى مادەنيەت ءمينيسترى ءىلياس وماروۆتىڭ كوزىن كورگەن اداممىن. ول ءبىزدىڭ مادەنيەتىمىز بەن ساياساتىمىزدا ۇلكەن ءىز قالدىرعان ۇمىتىلماس تۇلعا. اسحاتجان دا وسى تۇلعانىڭ جولىمەن ءجۇرىپ، حالقىمىزدىڭ جادىندا قالۋىنا تىلەكتەسپىن، – دەدى قازاقستاننىڭ حالىق جازۋشىسى ولجاس سۇلەيمەنوۆ.
كەزدەسۋ اياسىندا كەلگەن قوناقتار مەرەيتوي يەسىنە جىلى لەبىزدەرىن ءبىلدىرىپ، سىي-سىياپاتتارىن تابىستادى. سونداي-اق، ق ر ۇلتتىق كىتاپحاناسى قورىنان مۇرات اۋەزوۆتىڭ قىزمەتى مەن شىعارماشىلىعىنا ارنالعان «وتكىردىڭ ءجۇزى» اتتى كىتاپ كورمەسى ۇيىمداستىرىلدى.
