Sharaǵa Mádeniet jáne sport ministri Ashat Oralov, ziialy qaýym ókilderi Oljas Súleimenov, Smaǵul Elýbai, Tóregeldi Sharmanov, Baqytjan Qanapiianov jáne aqyn-jazýshylar men memleket jáne qoǵam qairatkerleri qatysty.
Ministr Murat Áýezovti mereitoiymen quttyqtai otyryp, ult abyzdarynyń ǵumyr joly jas urpaq úshin qashanda úlgi-ónege ekenin atap ótti.
– Ózińiz siiaqty zamana týdyrǵan zańǵarlarymyz kóp emes. Sizderdiń ónegeli ómir joldaryńyz óskeleń jas býynǵa qashanda temirqazyq bolýy qajet. Egemen eldiń eńsesin tiktep, táýelsizdikke tuǵyr boldyńyz. Biz óz kezegimizde, sizder salǵan sol taǵylymdy tanym jolymen jarqyn bolashaqqa aiqyn baǵyt ustanýymyz kerek. Áli de shyǵarmashylyǵyńyzdan qol úzbei, súbeli de súiekti eńbekterińizben halyq qazynasyn molaita berińiz, – dedi Ashat Oralov óziniń quttyqtaý sózinde.
– Búgin osyndai kezdesýde jańa mádeniet jáne sport ministri Ashat Oralovty qarsy alamyz. Men birinshi Mádeniet ministri Iliias Omarovtyń kózin kórgen adammyn. Ol bizdiń mádenietimiz ben saiasatymyzda úlken iz qaldyrǵan umytylmas tulǵa. Ashatjan da osy tulǵanyń jolymen júrip, halqymyzdyń jadynda qalýyna tilektespin, – dedi Qazaqstannyń halyq jazýshysy Oljas Súleimenov.
Kezdesý aiasynda kelgen qonaqtar mereitoi iesine jyly lebizderin bildirip, syi-syiapattaryn tabystady. Sondai-aq, QR Ulttyq kitaphanasy qorynan Murat Áýezovtiń qyzmeti men shyǵarmashylyǵyna arnalǵan «Ótkirdiń júzi» atty kitap kórmesi uiymdastyryldy.
