استانادا «تازا قازاقستان» اكسياسى اياسىندا مەكتەپ وقۋشىلارى اراسىندا «قۇستاردى ساقتا!» اتتى ءىس-شارا ءوتتى، دەپ حابارلايدى Dalanews.kz ەلوردا اكىمدىگىنىڭ رەسمي سايتىنا سىلتەمە جاساپ.
قۇستارعا قامقورلىق تانىتۋعا، جاس ۇرپاقتىڭ بويىندا جاناشىرلىق سەزىمىن قالىپتاستىرۋعا باعىتتالعان ءىس-شاراعا 100-گە جۋىق اتا-انا مەن بالا قاتىستى.
«مەكتەبىمىزدە «جاقسىلىق جاسا» اتتى ۇرانىمەن ءبىرقاتار يگى ءىس-شارا ءداستۇرلى تۇردە وتكىزىلىپ كەلەدى. بۇل جالپىقالالىق اكسيانىڭ نەگىزگى ماقساتى – وسكەلەڭ ۇرپاقتى قورشاعان ورتانى قورعاۋ، تابيعاتتى سۇيۋگە تاربيەلەۋ، تۇرعىندار مەن مەكتەپ وقۋشىلارىنىڭ ەكولوگيالىق كوزقاراسى مەن تابيعات الدىنداعى جاۋاپكەرشىلىگىن قالىپتاستىرۋ، ەكولوگيالىق مادەنيەتتى ارتتىرۋ، سونىمەن بىرگە تابيعاتتى قورعاۋ جۇمىسىنا ارالاستىرۋ. جاقسىلىق جاساۋدا اتا-انالار بالالارىمەن بىرگە ءتۇرلى قولونەر بۇيىمدارىن ازىرلەپ، مەكتەپ جارمەڭكەسىنە ۇسىنادى.
وقۋشىلارىمىز قارتتار ۇيىنە دە بارىپ، ءوز ونەرلەرىن پاش ەتىپ، مەرەكەلىك كونسەرت ۇيىمداستىرىپ جاتادى. ياعني، باستىسى قايىرىمدىلىقتى ناسيحاتتاۋدى كوزدەيمىز، – دەدى №79 مەكتەپ-ليسەيىنىڭ ديرەكتورى قۇرالاي مۇقىشيەۆا.
«تازا قازاقستان» اياسىندا وتكەن ءىس-شاراعا قاتىسقان باستاۋىش سىنىپ وقۋشىلارى اتا-انالارىمەن بىرگە قۇس ۇيالارىن ءوز قولدارىمەن ارنايى دايىنداپ، مەكتەپ اۋماعىندا ءىلدى. جىل سايىن اتالعان ءىس-شارادان قالىس قالماي، بەلسەندىلىك تانىتىپ كەلە جاتقان اتا-انالاردىڭ قاتارىندا وڭداسىن سەرىك ۇلى بار.
«№79 مەكتەپ-ليسەيىندە ءۇش بالام وقيدى. بالالارىممەن بىرگە ۇيالاردى ۇيدە جاساۋدى جاقسى داستۇرگە اينالدىردىق. بۇگىندە استانانىڭ ءبىرقاتار ساياباقتارىندا وتباسىمىزدىڭ دايىنداعان قۇس ۇيالارى ءىلۋلى تۇر. 2-سىنىپتا وقيتىن بالام دىنمۇحامەد وڭداسىنۇلىمەن بىرگە مەكتەپ اۋلاسىندا دا قۇستاردىڭ دا تۇراقتاپ، قالالىقتاردىڭ كوڭىلىن اسەم اۋەنىمەن قۋانتىپ تۇرسىن دەگەن نيەتپەن ۇيالار جاساپ، ىلدىك. بالا كورگەنىن ىستەيدى، سوندىقتان وسىنداي ىزگىلىككە باستايتىن باستامالاردىڭ بولعانى قۋانتادى»، - دەدى اتا-انا.
