استانا قالاسىنىڭ اكىمى جەڭىس قاسىمبەك Instagram پاراقشاسىندا جاڭادان اشىلاتىن مەكتەپتەر جايلى جازدى،- دەپ حابارلايدى Dalanews.kz
«قالانىڭ دامۋ بارىسىندا الەۋمەتتىك نىسانداردىڭ قۇرىلىسىنا ەرەكشە نازار اۋدارامىز. وتكەن وقۋ جىلىندا رەكوردتى كولەمدە وقۋ ورىندارى سالىندى. اتاپ ايتقاندا، 24 مەكتەپ پايدالانۋعا بەرىلىپ، 66 مىڭ وقۋشىعا ارنالعان ورىن (ەكى اۋىسىمدى) اشىلدى. سول 24 مەكتەپتىڭ 16-سى – جايلى مەكتەپ.
ق ر پرەمەر-مينيسترىنىڭ ءبىرىنشى ورىنباسارى رومان سكليارمەن جانە وقۋ-اعارتۋ ءمينيسترى عاني بەيسەمبايەۆپەن بىرگە جايلى مەكتەپتەردىڭ سالىنۋ بارىسىمەن تانىستىق. مەكتەپتەر قالانىڭ بارلىق اۋدانىندا ورنالاسادى.
جاڭا وقۋ جىلى ىشىندە تاعى 15 مەكتەپ اشۋدى جوسپارلاپ وتىرمىز. ونىڭ 7-ەۋى «جايلى مەكتەپ» ۇلتتىق جوباسى اياسىندا سالىنادى. بۇل جايلى مەكتەپتەر 28 مىڭ وقۋشىعا ارنالعان ورىن (ەكى اۋىسىمدى) اشۋعا مۇمكىندىك بەرەدى. ناتيجەسىندە، 4 ءۇش اۋىسىمدى جانە 7 شامادان تىس تولى مەكتەپتىڭ پروبلەماسى شەشىلەدى.
وسىلايشا، مەملەكەت باسشىسىنىڭ تاپسىرماسى اياسىندا استاناداعى جايلى مەكتەپتەردىڭ جالپى سانى 24-كە جەتەدى. سونىمەن قاتار، قالادا بالاباقشالار، وقۋشىلار سارايى جانە وزگە دە الەۋمەتتىك نىساندار سالىنىپ جاتىر»، – دەپ جازدى جەڭىس قاسىمبەك.
