RES 2026 EXPO كورمەسىنىڭ اشىلۋىندا جالپى قۇنى 2،3 ملرد دوللاردان اساتىن 17 مەموراندۋمعا قول قويىلدى. بۇل ورتالىق ازياداعى ەڭ ءىرى «جاسىل» كەلىسىمدەر پاكەتتەرىنىڭ ءبىرى بولدى، دەپ حابارلايدى Dala News.

كورمەنىڭ العاشقى كۇنى وڭىرلىك ەكولوگيالىق سامميت اياسىندا ءوتتى. ءىس-شاراعا قازاقستان، ارمەنيا، گرۋزيا، قىرعىزستان، موڭعوليا، تاجىكستان، تۇرىكمەنستان جانە وزبەكستان پرەزيدەنتتەرى مەن شەتەلدىك دەلەگاسيالار قاتىستى. قوناقتارعا ورتالىق ازيا ەلدەرى مەن ازەربايجاننىڭ ۇلتتىق پاۆيلوندارى تانىستىرىلدى. وندا جاسىل ەنەرگەتيكا، تابيعي رەسۋرستاردى باسقارۋ جانە ورنىقتى دامۋ باعىتىنداعى باسىمدىقتار كورسەتىلدى.

اشىلۋ سالتاناتى ءسامميتتىڭ باستى وقيعاسىنا اينالىپ، ۇكىمەت وكىلدەرىن، حالىقارالىق ۇيىمداردى، دامۋ ينستيتۋتتارىن جانە بيزنەس قاۋىمداستىقتى بىرىكتىردى. وعان ورتالىق ازيا ەلدەرىنىڭ ەكولوگيا مينيسترلەرى، يتاليانىڭ قازاقستانداعى ەلشىسى، سونداي-اق Green Climate Fund جانە وزگە دە حالىقارالىق ۇيىمداردىڭ وكىلدەرى قاتىستى.

كەلىسىمدەر پاكەتى ەكولوگيالىق ترانسفورماسيانىڭ نەگىزگى باعىتتارىن قامتىدى. اتاپ ايتقاندا، جاڭارتىلاتىن ەنەرگيا كوزدەرىن دامىتۋ، تومەن كومىرتەكتى تەحنولوگيالاردى ەنگىزۋ، قالدىقتاردى قايتا وڭدەۋ، تۇراقتى ونەركاسىپ ءوندىرىسى جانە كليماتتىق قارجىلاندىرۋ ماسەلەلەرى قامتىلعان.

ماڭىزدى قۇجاتتاردىڭ ءبىرى – قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگى مەن يتاليا رەسپۋبليكاسىنىڭ قورشاعان ورتا جانە ەنەرگەتيكالىق قاۋىپسىزدىك مينيسترلىگى اراسىنداعى مەموراندۋم بولدى.

ينۆەستيسيالىق جوبالاردىڭ ىشىندە قاراعاندى وبلىسىندا قۋاتى 500 مۆت بولاتىن جەل ەلەكتر ستانسياسىن سالۋ (قۇنى 645 ملن دوللار) جانە جالپى قۋاتى 2 گۆت-قا دەيىنگى جاڭارتىلاتىن ەنەرگيا جوبالارى بار. سونىمەن قاتار قالدىقتاردى وڭدەۋ، قوقىس جاعۋ زاۋىتتارىن سالۋ، كۇن جانە گيدروەنەرگەتيكا، تۇراقتى اۆياسيالىق وتىن (SAF)، كومىرتەك نارىقتارى جانە ورمان-كليمات جوبالارى بويىنشا باستامالار ۇسىنىلدى.

بۇل كەلىسىمدەر حالىقارالىق ينۆەستيسيا تارتۋعا، جاسىل تەحنولوگيالاردى كەڭەيتۋگە جانە ورتالىق ازيا ەلدەرى اراسىنداعى ىنتىماقتاستىقتى نىعايتۋعا نەگىز بولادى.

كورمە اياسىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ ەكسپوزيسيانى ارالاپ، وڭىرلەر مەن كومپانيالاردىڭ جوبالارىمەن تانىستى. ول ۇسىنىلعان باستامالاردىڭ جوعارى دەڭگەيىن اتاپ ءوتىپ، ەكولوگيالىق جۇكتەمەنى ازايتۋ ءۇشىن مۇنداي جوبالاردى كەڭىنەن ەنگىزۋ قاجەت ەكەنىن ايتتى.

RES 2026 EXPO – ءىرى تەحنولوگيالىق الاڭعا اينالدى. كورمەگە 30 ەلدەن 240-تان استام كومپانيا قاتىسىپ، 120-دان استام پاۆيلون ۇسىنىلدى. ەكسپوزيسيالار ونەركاسىپ، ەنەرگەتيكا، مۇناي-گاز، ماشينا جاساۋ جانە ەكولوگيالىق تەحنولوگيالاردى قامتىدى.

قاتىسۋشىلار ءوندىرىستى جاڭعىرتۋ، ۇزدىك قولجەتىمدى تەحنولوگيالاردى ەنگىزۋ، ەنەرگيا تيىمدىلىگىن ارتتىرۋ جانە شىعارىندىلاردى ازايتۋ باعىتىنداعى جوبالاردى تانىستىردى. اتاپ ايتقاندا، «قازاقمىس» پەن KAZ Minerals تۇراقتى ءوندىرىس جوبالارىن، «تەڭىزشيەۆرويل»، North Caspian Operating Company جانە KPO مۇناي-گاز سالاسىن ەكولوگيالاندىرۋ باستامالارىن، ERG ونەركاسىپتى جاڭعىرتۋ جوبالارىن، QazTehna ەكولوگيالىق كولىك شەشىمدەرىن جانە «قازمۇنايگاز» جوبالارىن ۇسىندى.

وڭىرلەر دە ءوز باستامالارىن كورسەتتى. پاۆلودار وبلىسى وندىرىستىك قالدىقتاردى قايتا وڭدەۋ جوبالارىن، قىزىلوردا وبلىسى سيركۋليارلى ەكونوميكا شەشىمدەرىن، قاراعاندى وبلىسى سۋ تازارتۋ جانە قالدىقتاردى وڭدەۋ تەحنولوگيالارىن تانىستىردى. اقتوبە وبلىسى «TazaPrint» ستارتاپىن ۇسىنىپ، پلاستيك قالدىقتارىن 3D-باسپا ماتەريالدارىنا اينالدىرۋ جوباسىن كورسەتتى.

23 ساۋىردە «ورتالىق ازيانىڭ جاسىل ترانسفورماسياسى» اتتى ينۆەستيسيالىق فورۋم ءوتتى. وعان 15-تەن استام ەلدەن 200-گە جۋىق قاتىسۋشى جينالىپ، ۇزدىك قولجەتىمدى تەحنولوگيالاردى ەنگىزۋ، ەكولوگيالىق رەتتەۋ جانە جاسىل ەكونوميكاعا سۇرانىستى قالىپتاستىرۋ ماسەلەلەرىن تالقىلادى.

كورمە تەك ىسكەرلىك الاڭ ەمەس، مادەني جانە يننوۆاسيالىق جوبالار ورتالىعىنا دا اينالدى. ASTANA ECO FILM FESTIVAL حالىقارالىق ەكولوگيالىق كينوفەستيۆالى ءوتىپ، 6 ەلدەن 50-دەن استام ءوتىنىم ءتۇستى. 15 فيلم كونكۋرسقا قاتىسىپ، جەڭىمپازدار انىقتالدى.

سونىمەن قاتار Green Runway Fashion Show تۇراقتى ءسان كورسەتىلىمى ۇيىمداستىرىلىپ، ورتالىق ازيا ەلدەرى مەن حالىقارالىق ديزاينەرلەر قاتىسقان 9 توپ ءوز كوللەكسيالارىن ۇسىندى.

Eco Startup Competition Central Asia 2026 بايقاۋىندا باس جۇلدەنى قازاقستاندىق Aua Line ستارتاپى جەڭىپ الدى. باسقا جۇلدەلى ورىنداردى قىرعىزستان مەن وزبەكستان جوبالارى يەلەندى. گران-پري جۇلدەسى 5 ملن تەڭگەنى، فيناليستەر 3 ملن تەڭگەدەن الدى.

جالپى، RES 2026 EXPO كورمەسىنە 20 مىڭنان استام ادام قاتىسىپ، ول ەكولوگيا، ينۆەستيسيا جانە يننوۆاسيا سالاسىنداعى وڭىرلىك جەتەكشى الاڭ رەتىندەگى مارتەبەسىن راستادى.