28 قاراشادا استانادا ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) ءسامميتى وتەدى. بۇل شاراعا تمد-نىڭ باس حاتشىسى سەرگەي لەبەديەۆ پەن شىۇ-نىڭ باس حاتشىسى چجان مين شاقىرىلدى. اقپاراتتى قازاقستان سىرتقى ىستەر مينيسترلىگىنىڭ باسپا ءسوز قىزمەتى راستادى، دەپ حابارلايدى Dalanews.kz.
سامميتكە رەسەي باسشىسى ۆلاديمير پۋتين، قازاقستان پرەزيدەنتى قاسىم-جومارت توقايەۆ، بەلارۋس كوشباسشىسى الەكساندر لۋكاشەنكو، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون جانە ۇقشۇ باس حاتشىسى يمانعالي تاسماعانبەتوۆ قاتىسادى دەپ جوسپارلانۋدا.
سامميت بارىسىندا ايماقتىق جانە جاھاندىق قاۋىپسىزدىك ماسەلەلەرى، سونداي-اق قازاقستاننىڭ ۇقشۇ ءتوراعالىعى كەزىندە جۇزەگە اسىرىلىپ جاتقان باسىم باعىتتار تالقىلاناتىن بولادى دەپ حابارلاندى.
ايتا كەتەيىك،ارمەنيا ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) سامميتىنە قاتىسپايدى.
بۇل تۋرالى ەلدىڭ سىرتقى ىستەر ءمينيسترى ارارات ميرزويان مالىمدەگەن بولاتىن.
"ارمەنيا ۇقشۇ سىرتقى ىستەر مينيسترلەرى كەڭەسىنىڭ، قورعانىس مينيسترلەرى كەڭەسىنىڭ جانە قاۋىپسىزدىك كەڭەسى حاتشىلارى كوميتەتىنىڭ وتىرىستارىنا قاتىسپايدى"،—دەدى ول.
اتالعان اقپاراتتى رەسەيدىڭ ۇقشۇ جانىنداعى تۇراقتى وكىلى ۆيكتور ۆاسيليەۆ ريا نوۆوستي اگەنتتىگىنە راستادى.
"ارمەنيالىق ارىپتەستەر بۇل ءىس-شاراعا جەكە قاتىسۋدان باس تارتتى. سونىمەن قاتار ولار بەكىتىلۋى ءتيىس بارلىق قۇجاتتىڭ شەكتەۋلى فورماتتا قابىلدانۋىنا قارسى ەمەس"، — دەپ ءتۇسىندىردى وكىل.
