قازاقستان رەسپۋبليكاسىنىڭ كونستيتۋسياسى – مەملەكەتىمىزدىڭ ەڭ باستى قۇجاتى. وندا ءاربىر ازاماتتىڭ قۇقىقتارى مەن بوستاندىقتارى ايقىن كورسەتىلگەن. سولاردىڭ ىشىندە ۇرپاق بولاشاعىنا ەرەكشە ءمان بەرەتىن باپتاردىڭ ءبىرى – بالالاردىڭ تەگىن ورتا ءبىلىم الۋعا قۇقىعى. استانا قالاسى سىرباي ماۋلەنوۆ اتىنداعى №37 مەكتەپ-ليسەي ديرەكتورى گۇلجان تولەۋ مۇنى مەملەكەتتىڭ جاس ۇرپاققا جاساعان ەڭ ۇلكەن قامقورلىعى ءارى ەل دامۋىنىڭ بەرىك نەگىزى دەپ ەسەپتەيدى،- دەپ حابارلايدى Dalanews.kz
ونىڭ ايتۋىنشا، اتا زاڭدا بەكىتىلگەن وسى قۇقىقتىڭ ارقاسىندا قازىرگى ۋاقىتتا ەلىمىزدىڭ بارلىق وڭىرىندە بالالار مەكتەپكە بارىپ، ءبىلىم الۋعا تەڭ مۇمكىندىككە يە. بۇل يگىلىكتى ءىس استانا قالاسىنداعى سىرباي ماۋلەنوۆ اتىنداعى №37 مەكتەپ-ليسەيىندە دە جۇيەلى جۇزەگە اسىپ جاتىر.
«بيىلعى وقۋ جىلىنداعى تىڭ جاڭالىعىمىز – مەكتەپتىڭ ەكى اۋىسىمدى ءبىلىم بەرۋ تارتىبىنە كوشۋ قۋانىشى. بۇل ناتيجەگە، ەڭ الدىمەن، مەملەكەت باسشىسى قاسىم-جومارت كەمەل ۇلى توقايەۆتىڭ ۇلتتىق جوباسى زاماناۋي كەلەشەك مەكتەپتەرىنىڭ سالىنۋىنىڭ ارقاسىندا جەتىپ وتىرمىز. قازىرگى تاڭدا مەكتەپتىڭ جوبالىق قۋاتىنا سايكەس، 3500 وقۋشىمەن جاڭا وقۋ جىلىن باستاعالى وتىرمىز. ولاردىڭ جان-جاقتى دامۋىنا جاعداي جاسالىپ، وقۋ پروسەسىن ساپالى ۇيىمداستىرۋ ءۇشىن مەكتەپ عيماراتى جوندەۋدەن ءوتىپ، وقۋ-ادىستەمەلىك قۇرالدارمەن قامتاماسىز ەتىلىپ، ماتەريالدىق جابدىقتاۋ جۇزەگە اسىرىلعان. بيىلعى وقۋ جىلىنان باستاپ جاساندى ينتەللەكت (جي) بويىنشا 1-11 سىنىپتار ءۇشىن ارنايى كۋرستار باستالاتىن بولادى.
وقۋشىلاردىڭ بوس ۋاقىتىن ءتيىمدى ۇيىمداستىرۋ ماقساتىندا ءتۇرلى ۇيىرمەلەر مەن سەكسيالار جۇمىس ىستەيدى. سپورتتىق جارىستار مەن پاندىك وليمپيادالار، عىلىمي جوبالارعا قاتىسىپ جۇرگەن شاكىرتتەرىمىزدىڭ جەتىستىكتەرى دە از ەمەس. سونداي-اق بۇگىنگى كۇنى 200-گە جۋىق وقۋشىمىز الەۋمەتتىك قولداۋدى قاجەت ەتەتىن بالالارعا ارنالعان مەملەكەت تاراپىنان كورسەتىلەتىن قارجىلاي جانە ماتەريالدىق قولداۋدى سەزىنىپ وتىر»، - دەدى گۇلجان ءدارىباي قىزى.
ونىڭ ايتۋىنشا، كونستيتۋسيادا كورسەتىلگەن ءقاۋىپسىز ورتادا تەگىن ءبىلىم الۋ قۇقىعى – بۇگىنگى ومىرىمىزدە ناقتى جۇزەگە اسىپ وتىرعان باعا جەتپەس مۇمكىندىك. بىلىمگە جول اشۋ ارقىلى مەملەكەت جاس ۇرپاقتىڭ جارقىن بولاشاعىنا ايرىقشا قولداۋ جاساپ وتىر.
