وڭتۇستىك قازاقستان وبلىسىنىڭ استانا قالاسىنداعى كۇندەرى اياسىندا «قازاقستان» ورتالىق كونسەرت زالىنىڭ فويەسىندە «جەر كىندىگى – قازىعۇرت» اتتى كوپ سالالى عىلىمي كوركەمونەر كورمەسى وتۋدە. ەلباسىنىڭ «بولاشاققا باعدار: «رۋحاني جاڭعىرۋ» ماقالاسىن ناسيحاتتاۋعا ارنالعان شارانىڭ ماقساتى -  استانا قوناقتارى مەن جۇرتشىلىعىن وڭتۇستىكتىڭ تاريحي شەجىرەسىمەن شىعارمالارىمەن تانىستىرۋ.



وڭتۇستىك ءوڭىرى تاريحي-مادەني ەسكەرتكىشتەرگە تولى ايماق. «جەر كىندىگى قازىعۇرت» كوپ سالالى عىلىمي كوركەمونەر كورمەسىندە 9 بولىمنەن تۇراتىن تاريحي شەجىرەدەن سىر شەرتەتىن بەلگىلى قىلقالام يەلەرىنىڭ شىعارمالارى، قولونەر شەبەرلەرىنىڭ جاساعان بۇيىمدارى مەن تاريحي فوتوسۋرەتتەرى جانە وبلىس  مۋزەيلەرىنىڭ جادىگەرلەرى جۇرت نازارىنا ۇسىنىلدى.

ماسەلەن،  «وڭتۇستىك تابيعاتى» بۇرىشىندا  ءوڭىردىڭ اسەم تابيعات كورىنىستەرىنەن فوتوسۋرەتتەر مەن كەسكىندەمەلىك جۇمىستار، قازبا بايلىقتاردىڭ ۇلگىلەرى، كەنتاۋداعى تاۋ-كەن تاريحى مۋزەي قورىنان، سايرام، وگەم، قاراتاۋ تاۋلارىنىڭ، اقسۋ – جاباعىلى قورىعىنىڭ فوتوسۋرەتتەرى، كەلىنشەك تاۋ، تۇلكىباس، قازىعۇرت تاۋى جانە وبلىس تابيعاتىن بەينەلەيتىن كەسكىندەمەلىك كارتينالار ورنالاستىرىلعان. ال، «كونەنىڭ كوزى – تاريحتىڭ ءوزى» بۇرىشىندا  كونە وتىرار كالاسىنان ارحەولوگيالىق قازبا جۇمىستارى كەزىندە تابىلعان قىش قۇمىرالار، كۇمىس تەڭگەلەر ت.ب. قۇندى جادىگەرلەر، تۇركىستان ق.ا. ياساۋي كەسەنەسىنىڭ ماكەتى، ەجەلگى قالالاردىڭ فوتوسۋرەتتەرى، اەروفوتوسۋرەتتەر، تاقىرىپقا بايلانىستى كەسكىندەمەلىك كارتينالار، قىشتان جاسالعان ىدىستار، مونيتوردان بەينە فيلم كورسەتىلدى.

«قول ونەرىم-ونەگەم اتتى بۇرىشتا قازاق حالقىنىڭ ەتنوگرافيالىق كوللەكسيالارى، اياققاپتار، قورجىندار، شاشاقباۋلار، باسقۇرلار، زەرگەرلىك بۇيىمدار، كادەسىيلىقتار مەن  ۇلتتىق بۇيىمدار قويىلسا،  «تاريحي مادەني ەسكەرتكىشتەر» تاقىرىبىندا  دومالاق انا، بايدىبەك اتا، ىسقاق بابا، بابا تۇكتى شاشتى ءازىز كەسەنەلەرىنىڭ فوتوسۋرەتتەرى مەن ماكەتتەرى،  VIII- IX ع.ع. قىش ىدىستارى ءىلىندى. سونداي-اق كورمەدە  «قولونەر بۇيىمدارىن ساتۋ بۇرىشى»،  «كونە كىتاپ الەمى» – كىتاپتار بەينەلەنگەن فوتوسۋرەتتەر، كونە كىتاپتار،  «حاندىق ءداۋىر» – حاندىق ءداۋىردى كورسەتەتىن كەسكىندەمەلىك كارتينالار، ساۋىت، قارۋ-جاراق، حان تاعى، تايقازان، لاۋحا تاعى دا باسقا جادىگەرلەر جۇرت نازارىنا ۇسىنىلدى.

وبلىستىق مادەنيەت باسقارماسىنىڭ باسشىسى نۇربولات احمەتجانوۆتىڭ ايتۋىنشا، كورمەگە كەلۋشىلەردى اسىرەسە،   ۇلى سازگەر – ءشامشى قالداياقوۆتىڭ، كۇش اتاسى – قاجىمۇقان مۇڭايتپاس ۇلىنىڭ كەسكىندەمەلىك فوتوسۋرەتتەرى مەن پورترەتتەرى، ولاردىڭ جەكە قولدانعان زاتتارى، مەدالدارى، جارناما قاعازدارى تاڭ-تاماشا ەتكەن.

 

 

 

وقو اكىمىنىڭ باسپا ءسوز قىزمەتى