استاناداعى جەكە جەر تەلىمىنىڭ يەسى ءوز ۋچاسكەسىنىڭ قوقىس توگىلەتىن ورىنعا اينالعانىن ايتىپ، شاعىمداندى. ونىڭ سوزىنشە، قالا ىشىندەگى، گاز قوندىرعىلارى ورنالاسقان اۋماقتاعى جەرگە رۇقساتسىز قوقىس توگىلە باستاعان، دەپ حابارلايدى Dalanews.kz.
يەسىنىڭ ايتۋىنشا، بۇل ارەكەت ونىڭ كەلىسىمىنسىز جاسالعان. ال كەي مالىمەتتەردە قوقىس توگۋگە اكىمدىك تاراپىنان كەلىسىم بەرىلۋى مۇمكىن دەگەن بولجام بار.
الەۋمەتتىك جەلىدە تاراعان ۆيدەودا اۆتور جاعدايدى اشىنا جەتكىزدى.
"استانانىڭ قاق ورتاسى عوي. گاز اپپاراتۋراسى تۇرعان جەردىڭ ءوزى قوقىس الاڭىنا اينالىپ كەتىپتى. قاسىندا ۋنيۆەرسيتەت، وتكەلدەر بار"، – دەيدى ول.
قالا تۇرعىندارى مۇنداي كورىنىس ەلوردا كەلبەتىنە سىن ەكەنىن ايتىپ، جاۋاپتى مەكەمەلەردەن ناقتى شارا قابىلداۋدى تالاپ ەتتى.
