استانا ءماسليحاتىنىڭ بۇرىنعى دەپۋتاتى عابيت ساتماعامبەتوۆ قۇرىلتايشىسى بولىپ كەلەتىن "نۇر-سۇلتان فينانس" ج ش س ۇلەسكەرلەرىنىڭ ارىزى بويىنشا شەنەۋنىكتىڭ ۇستىنەن قىلمىستىق ءىس قوزعالدى، دەپ حابارلايدى Dalanews.kz.
"استانا قالاسى ەسىل اۋدانىنىڭ پوليسيا باسقارماسى ۇلەسكەرلەردىڭ ءوتىنىشى بويىنشا ق ر قك 190-بابىنىڭ 2-بولىگى (الاياقتىق) بويىنشا سوتقا دەيىنگى تەرگەپ-تەكسەرۋ جۇمىستارىن جۇرگىزۋدە. ونىڭ نەگىزىندە ءىستىڭ ءمان-جايىن انىقتاۋ ءۇشىن ءتيىستى شارالار قابىلدانادى. قازىرگى ۋاقىتتا بارلىق قاجەتتى تەرگەۋ ارەكەتتەرى جۇرگىزىلۋدە. ناتيجەسى بويىنشا كىنالى تۇلعالاردىڭ ءىس - ارەكەتتەرىنە قۇقىقتىق باعا بەرىلىپ، اتالمىش ءىس بويىنشا شەشىم شىعارادى"، - دەپ جاۋاپ بەردى ىشكى ىستەر مينيسترلىگى قازتاگ رەداكسياسىنىڭ جولداعان ساۋالىنا.
وسى تۇستا قازتاگ اگەنتتىگىنىڭ رەداكسياسىنا ەلوردا تۇرعىنى ادىلبەك احمەتوۆ جۇگىنگەن. ول ءوزىن "نۇر-سۇلتان فينانس" ءجشس-نىڭ سالىمشىسى ەكەنىن جانە ونىڭ قۇرىلتايشىسى اتىشۋلى G-Park قۇرىلىس كومپانياسىنا يەلىك ەتەتىن ساتماعامبەتوۆ ەكەنىن مالىمدەگەن.
احمەتوۆتىڭ ايتۋىنشا، ول سوتتا ۇلەسكەر رەتىندە سالعان قاراجاتىن قايتارىپ الۋ تۋرالى شەشىمگە قول جەتكىزگەن. دەگەنمەن "نۇر-سۇلتان فينانس" ج ش س سوت شەشىمىن ورىنداماي وتىر. سونىمەن قاتار "نۇر-سۇلتان فينانس" ج ش س ۇلەسكەرلەردىڭ قاراجاتىن تارتۋعا ەشقانداي قۇقىعى بولماعان جانە بۇل قۇرىلىس سالۋشى تاراپىنان الاياقتىق فاكتىسى بولىپ ەسەپتەلەتىنىن العا تارتتى.
ادىلبەكتىڭ سوزىنشە، بۇل قاتاردا زارداپ شەككەن 600-گە جۋىق ۇلەسكەر بار. سونىڭ ىشىندە ونعا جۋىعى سوت ارقىلى قاراجاتىن قايتارۋ تۋرالى شەشىمگە قول جەتكىزگەن.
ەندى جابىرلەنۋشىلەر جوسىقسىز قۇرىلىس سالۋشىنىڭ ۇستىنەن قىلمىستىق ءىس قوزعاماق. ءبىراق ايتۋلارىنشا، قۇقىق قورعاۋ ورگاندارى بۇل ءىس بويىنشا ارەكەت ەتۋگە نيەتتى ەمەس جانە قىلمىستىق ءىس قوزعاۋدان باس تارتقان.
وسى تۇستا ولار ساتماعامبەتوۆتىڭ ارىزى بويىنشا پوليسيا DALAINSIDE جۋرناليستەرىنە قارسى قىلمىستىق ءىس قوزعاعانىن اتاپ ءوتتى. ال بۇل جاعداي قوعامدا ۇلكەن نارازىلىق تۋدىرعان سوڭ، ءىس قىسقا مەرزىمدە توقتاتىلعانىنا نازار اۋداردى.
ەسكە سالايىق، 19 اقپاندا Dalanews جانە DALA INSIDE رەداكسيالارىنىڭ جۋرناليستەرى وسى ءىس بويىنشا قازاقستان جۋرناليستەر وداعىنان قولداۋ سۇراپ، ساتماعامبەتوۆ پەن ونىڭ قۇرىلىس كومپانياسى G-Park تاراپىنان قىسىم كورسەتىلىپ جاتقانىن حابارلاعان بولاتىن. بۇل استانا قالاسى بويىنشا قازاقستان جۋرناليستەر وداعى فيليالىنىڭ باقىلاۋىندا بولدى.
20 اقپاندا مادەنيەت جانە اقپارات مينيسترلىگىنىڭ وكىلدەرى قازاقستان جۋرناليستەر وداعىنىڭ ەلوردالىق فيليالىنىڭ باسشىسىنا حابارلاسىپ، ءتيىستى ۆەدومستۆونىڭ ارالاسۋىنان كەيىن ءىستىڭ جابىلعانىن حابارلادى. بۇنى پوليسيانىڭ ءوزى راستادى.
ايتا كەتەيىك، سوڭعى ۋاقىتتا ساتماعامبەتوۆتىڭ باسى داۋلى ماسەلەدەن ارىلا الماي كەلەدى. مىسالى، 2022 جىلى نۇر-سۇلتانداعى كوپبالالى انالارمەن جانجالداسىپ، كوپتىڭ سىنىنا ۇشىراعان بولاتىن. ال اقپان ايىندا قۇرىلىس كومپانياسىنا قاتىستى قىلمىستىق ءىس قوزعالدى.
