بالالاردىڭ جاس ەرەكشەلىكتەرىن ەسكەرە وتىرىپ، مەكتەپكە دەيىنگى مەكەمەلەردىڭ تاربيەلەنۋشىلەرى مەن باستاۋىش سىنىپ وقۋشىلارىنا ارنالعان «جۇلدىزدى جول» وليمپياداسى، «ەلوردا ەركەتايى» شىعارماشىلىق بايقاۋى، «بەستەمشە» سپورتتىق ءىس-شاراسى، 2-7 سىنىپ وقۋشىلارىنا ارنالعان قالالىق عىلىمي جۇمىستار مەن شىعارماشىلىق جوبالار بايقاۋى، 2-4 سىنىپ وقۋشىلارى اراسىنداعى رەسپۋبليكالىق پاندىك وليمپيادا ۇزدىكسىز ۇيىمداسترىلىپ كەلەدى.
ورتا بۋىن وقۋشىلارى ءۇشىن جالپى ءبىلىم بەرەتىن پاندەر بويىنشا جاسوسپىرىمدەر وليمپياداسى، 5-6 سىنىپتار ءۇشىن رەسپۋبليكالىق پاندىك وليمپيادا، 7-8 سىنىپ وقۋشىلارى ءۇشىن گەوگرافيا بويىنشا ۇلتتىق وليمپيادا، حيميا جانە بيولوگيا بويىنشا ۇلتتىق وليمپيادا وتكىزىلەدى.
وسى زياتكەرلىك تۋرنيرلەردىڭ جەڭىمپازدارى مەن جۇلدەگەرلەرى «دارىن» رەسپۋبليكالىق عىلىمي-پراكتيكالىق ورتالىعىنىڭ ديپلومدارىمەن، مەدالدارمەن جانە باعالى سىيلىقتارمەن ماراپاتتالادى.
جوعارى سىنىپ وقۋشىلارى ءۇشىن رەسپۋبليكالىق دەڭگەيدەگى پرەزيدەنتتىك جانە لينگۆيستيكالىق وليمپيادالار، جالپى ءبىلىم بەرەتىن پاندەر بويىنشا عىلىمي جوبالار بايقاۋى، قالالىق جانە رەسپۋبليكالىق «اباي وقۋلارى»، «اقسەلەۋ وقۋلارى»، «قادىر وقۋلارى»، «ماعجان وقۋلارى»، ينتەللەكتۋالدىق جانە شىعارماشىلىق بايقاۋلار: «اباي الەمى»، «مەنىڭ كىشى وتانىم»، «مەنىڭ باستامام – مەنىڭ وتانىم ءۇشىن»، حالىقارالىق STEM وليمپياداسى، «Robotek Grand Tournament» رەسپۋبليكالىق روبوتوتەحنيكا ءتۋرنيرى، روبوتوتەحنيكادان عىلىمي-تەحنيكالىق جوبالار بايقاۋى.
– جىل سايىن وليمپيادا قوزعالىسىنىڭ ساپاسى ارتىپ، قاتىسۋشىلار قاتارى كوبەيىپ كەلەدى. تەك 2023 جىلدىڭ وزىندە استانا وليمپياداشىلارى 522 مەدال يەلەندى، ونىڭ 257ء-سى – رەسپۋبليكالىق، 265ء-ى – حالىقارالىق. استانا قۇراماسى جىل سايىن «ەڭ ۇزدىك وليمپيادالىق كوماندا» اتاعىن جەڭىپ الادى.
زياتكەرلىك وليمپيادالارعا ساپالى دايىندالۋ جانە ءساتتى ونەر كورسەتۋ ءۇشىن «استانا دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعى كانيكۋل كۇندەرى وقۋ-جاتتىعۋ جيىندارىن وتكىزەدى جانە جيىن كەزىندە وتكەن جىلدارداعى حالىقارالىق وليمپيادالاردىڭ بۇرىنعى جەڭىمپازدارى مەن جۇلدەگەرلەرى تاجىريبەلەرىمەن ءبولىسىپ، جاس زياتكەرلەر دايىندىعىنا ءوز ۇلەستەرىن قوسادى، – دەدى سپيكەر.
مەكتەپ تۇلەكتەرىنە ماماندىق تاڭداۋعا جانە ولاردىڭ تالاپتارى مەن قاجەتتىلىكتەرىنە سايكەس كەلەتىن وقۋ ورنىن تاڭداۋعا كومەكتەسۋ ءۇشىن ورتالىقتا «Qabilet» كاسىپتىك باعدار بەرۋ قىزمەتى جۇمىس ىستەيدى.
اتالعان قىزمەتتىڭ نەگىزگى ماقساتى – 7-11 سىنىپ وقۋشىلارىنىڭ زياتكەرلىك قابىلەتتەرى مەن كاسىبي ءوزىن-وزى تانۋ، ونىڭ پسيحولوگياسىن، داعدىسىن، ءبىلىمىن، دارىندىلىعىن ەسكەرە وتىرىپ، وقۋشىنىڭ كەز كەلگەن ماماندىققا بەيىمدىلىگىن انىقتاۋعا باعىتتالعان.
– دارىندى بالالاردى قولداۋ جانە ىنتالاندىرۋ ماقساتىندا قالا اكىمى جىل سايىن ەلوردانىڭ دارىندى وقۋشىلارى – حالىقارالىق، رەسپۋبليكالىق وليمپيادالار مەن عىلىمي جوبا بايقاۋلارىنىڭ جەڭىمپازدارى جانە جۇلدەگەرلەرىمەن كەزدەسەدى. وقۋشىلار استانا قالاسى اكىمىنىڭ اتىنان العىس حاتتارمەن جانە اقشالاي سەرتيفيكاتتارمەن ماراپاتتالادى.
استاناداعى ءبىلىم بەرۋ سالاسىنىڭ جۇيەلى جانە جەمىستى جۇمىسىنىڭ ارقاسىندا ەلوردالىق مەكتەپ وقۋشىلارىنىڭ ەسىمدەرى حالىقارالىق ينتەللەكتۋالدىق ارەنالاردا ءجيى ەستىلىپ ءجۇر.
حالىقارالىق رەيتينگتىك وليمپيادالاردىڭ جەڭىمپازدارى مەن جۇلدەگەرلەرى (IMO، ICho، IPho، IGeo، IOI، IOL) قازاقستاندىق جوعارى وقۋ ورىندارىنىڭ ءبىلىم بەرۋ گرانتتارىن يەلەنسە، سونىمەن قاتار بەدەلدى شەتەل ۋنيۆەرسيتەتتەرىنە 100% جەڭىلدىكپەن وقۋعا شاقىرتۋ الادى، – دەپ اتاپ ءوتتى ءبىلىم باسقارماسى باسشىسىنىڭ ورىنباسارى.
مەملەكەتتىڭ جان-جاقتى قولداۋى مەن قازاقستاندىق وقۋشىلاردىڭ جەتىستىكتەرىنىڭ ارقاسىندا تاريحتا تۇڭعىش رەت 2024 جىلدىڭ شىلدەسىندە استانادا بەدەلدى الەمدىك وليمپيادالاردىڭ ءبىرى – بيولوگيا بويىنشا حالىقارالىق وليمپيادا وتەدى.
