2024 جىلعى 27 قىركۇيەگىندە استانادا، اتىراۋ كوپىرىندە قازاقستاننىڭ اتوم سالاسى قىزمەتكەرى كۇنىنە وراي ۇيىمداستىرىلعان فوتوكورمە جۇمىسىن باستادى. كورمەنى قازاقستان رەسپۋبليكاسى ەنەرگەتيكا مينيسترلىگى ۇيىمداستىردى، دەپ حابارلايدى Dalanews.kz.
فوتوكورمەدە كوپشىلىك نازارىنا ەلىمىزدىڭ اتوم ونەركاسىبىندەگى نەگىزگى كاسىپورىندارداعى مامانداردىڭ كۇندەلىكتى جۇمىسى تۋرالى سىر شەرتەتىن بىرەگەي كادرلار ۇسىنىلعان. ەكسپوزيسيادا "ۇلتتىق يادرولىق ورتالىق" رمك، يادرولىق فيزيكا ينستيتۋتى رمك، "ماەك" ج ش س جانە "قازاتومونەركاسىپ" ۇاك" اق جۇمىسكەرلەرىنىڭ، سونداي-اق يادرولىق قوندىرعىلار مەن سالاداعى بىرەگەي تاريحي ساتتەردىڭ فوتوسۋرەتتەرى قويىلعان. قازىرگى ۋاقىتتا قازاقستاننىڭ اتوم ونەركاسىبىندە 17 مىڭنان استام ادام جۇمىس ىستەيدى، كورمەدە ولاردىڭ ەڭبەكتەرى مەن سالانىڭ دامۋىنا قوسقان ۇلەسىنە ءتيىستى قۇرمەت كورسەتىلەدى.
"اتوم سالاسى قىزمەتكەرلەرىنىڭ كۇنى وسى سالادا ەڭبەك ەتەتىن ادامداردىڭ باستى كاسىبي مەرەكەسى بولىپ تابىلادى. بۇل كورمە جۇمىسىمىزدىڭ ناتيجەسىن كورسەتىپ، ەلىمىزدىڭ يگىلىگى ءۇشىن كۇن سايىن ەڭبەك ەتىپ جۇرگەن جاندارعا قۇرمەت كورسەتۋگە دەگەن مۇمكىندىك. ءبىز اتوم ونەركاسىبىنىڭ دامۋىنا ۇلەس قوسا الاتىنىمىزدى ماقتان تۇتامىز جانە جىل وتكەن سايىن سالامىزدىڭ نىعايا تۇسەتىنىنە سەنىمدىمىز"، - دەدى ق ر ەم اتوم ەنەرگەتيكاسى جانە ونەركاسىپ دەپارتامەنتىنىڭ ديرەكتورى عۇمار سەرعازين.
فوتوكورمە اتوم سالاسى قىزمەتكەرلەرىنە ىزگىلىك كورسەتۋگە ارنالعان. كورمە بارلىعىنا اشىق جانە 29 قىركۇيەككە دەيىن جالعاسادى.
قازاقستان رەسپۋبليكاسى ەنەرگەتيكا مينيسترلىگى ەلىمىزدىڭ اتوم ونەركاسىبىنىڭ قالىپتاسۋى مەن دامۋىنا قوسقان ۇلەستەرى ءۇشىن بارلىق قىزمەتكەرلەرگە العىسىن بىلدىرەدى جانە ازاماتتاردى وسى سالا قىزمەتكەرلەرىنىڭ جۇمىسىمەن جاقىنىراق تانىسۋ ءۇشىن كورمەنى تاماشالاۋعا شاقىرادى.
