ەلوردادا كامەلەتكە تولماعانداردى پايدالانۋ ارقىلى قوعامدىق ورىنداردا زاڭسىز اقشا جيناۋ دەرەكتەرى انىقتالدى، دەپ حابارلايدى Dalanews.kz.
قالالىق پروكۋراتۋرانىڭ حابارلاۋىنشا، قۇقىق قورعاۋ ورگاندارى 2008–2010 جىلدارى تۋعان سەگىز ءجاسوسپىرىمدى انىقتاعان. ولار ءۇش قايىرىمدىلىق قورىنىڭ «ەرىكتىسى» رەتىندە تارتىلعان.
اتالعان قورلار «قايىرىمدىلىق» دەگەن جەلەۋمەن جالپى سوماسى شامامەن 340 ملن تەڭگە قاراجات جيناعان.
بۇل دەرەك بويىنشا پوليسيا ق ر قك 190-بابى 2-بولىگىنىڭ 1-تارماعى («الاياقتىق») بويىنشا قىلمىستىق ءىس قوزعادى. تەرگەۋ اياسىندا قورلاردىڭ لاۋازىمدى تۇلعالارىنىڭ كامەلەتكە تولماعانداردى زاڭسىز قىزمەتكە تارتۋىنا قۇقىقتىق باعا بەرىلەدى.
"قايىرىمدىلىق قورلارىن جانە اتا-انالاردى بالالاردىڭ ەڭبەگىنە، سونىڭ ىشىندە ەرىكتىلىك پەن وزگە دە قىزمەت تۇرلەرىنە مۇقيات قاراۋعا، بالالاردى زاڭعا قايشى ارەكەتتەرگە ارالاستىرماۋعا شاقىرامىز"، - دەلىنگەن حابارلامادا.
ەسكە سالساق، بۇعان دەيىن استانادا «Biz birgemiz Qazaqstan» قايىرىمدىلىق قورىنىڭ باسشىسى پەريزات قايرات پەن ونىڭ اناسى گايني الاشبايەۆاعا قاتىستى قىلمىستىق ءىس بويىنشا ۇكىم شىققان بولاتىن. ايىپتالۋشىلار مۇگەدەك بالالارعا كومەك كورسەتۋ، تاياۋ شىعىستا زارداپ شەككەندەر مەن قازاقستانداعى سۋ تاسقىنى قۇرباندارىنا قاراجات جيناۋ جەلەۋىمەن الاياقتىق جاسادى دەپ تانىلعان.
جينالعان 2،08 ملرد تەڭگەنىڭ تەك 920 ملن تەڭگەسى عانا قايىرىمدىلىققا جۇمسالعان. قالعان قارجى ايىپتالۋشىلاردىڭ جەكە قاجەتتىلىكتەرىنە پايدالانىلعان.
