استانا قالالىق پوليسيا دەپارتامەنتى اگروساراپشى، فەرمەرلەردىڭ ءبىرىڭعاي رەسپۋبليكالىق قاۋىمداستىعىنىڭ نەگىزىن قالاۋشى كيريلل پاۆلوۆتىڭ اۋىل شارۋاشىلىعى ءمينيسترى ايداربەك ساپاروۆقا قارسى جازعان ارىزى بويىنشا قىلمىستىق ءىس قوزعاۋدان باس تارتقان، دەپ حابارلايدى Dalanews.kz.
پاۆلوۆتىڭ ايىبى
ساراپشى ءمينيستردى قازاقستاننىڭ ءسۇت ونىمدەرىمەن تولىق قامتاماسىز ەتىلگەنى جونىندە جالعان مالىمەت تاراتتى دەپ ايىپتاعان. پاۆلوۆ قىركۇيەك ايىندا ارىزدى ەسىل اۋداندىق پوليسيا باسقارماسىنا تاپسىرعان جانە پرەزيدەنت اكىمشىلىگىنەن بۇل ءىستى باقىلاۋعا الۋدى سۇراعان.
«قازاقستان 100% ءسۇت ونىمدەرىمەن ءوزىن تولىق قامتاماسىز ەتەدى دەگەن جالعان اقپارات تاراتقانى ءۇشىن اۋىل شارۋاشىلىعى ءمينيسترى ساپاروۆقا قاتىستى استانا پوليسياسىنا ارىز جازدىم»، - دەپ مالىمدەگەن پاۆلوۆ.
رەسمي دەرەكتەر مينيستر سوزىنە قايشى
ساراپشى ءوز ءسوزىن رەسمي ستاتيستيكامەن جانە حالىقارالىق بازالارداعى دەرەكتەرمەن دالەلدەگەن. 2024 جىلى قازاقستان 183 مىڭ توننا ءسۇت پەن ءسۇت ءونىمىن يمپورتتاعان. بۇل 410،7 ميلليون دوللار (222،4 ميلليارد تەڭگە) بولعان.
پاۆلوۆتىڭ ەسەبىنشە:
ەلدەگى ىرىمشىك پەن سۇزبە نارىعىنىڭ 48%-ى يمپورتقا تاۋەلدى؛
سارى ماي مەن مايلى ءسۇت ونىمدەرىنىڭ 15%-ى دا شەتەلدەن كەلەدى.
جاقىندا ساراپشى ءوز وتىنىشىنە بەينەجازبا تۇرىندە قوسىمشا دالەل جولدادى. وندا اۋىل شارۋاشىلىعى مينيسترلىگىنىڭ اگروونەركاسىپ جانە قايتا وڭدەۋ دەپارتامەنتىنىڭ ديرەكتورى شايمەردەن احمەتوۆ ەلدىڭ ءسۇت ونىمدەرىمەن ءوزىن تولىق قامتي الماي وتىرعانىن مويىندايدى.
پاۆلوۆ بۇل جازبانى «ءوز ءۋاجىمنىڭ 100% دالەلى» دەپ اتاپ، ونى ءىستىڭ ماتەريالدارىنا قوسۋدى سۇراعان.
پوليسيا ءىستى تىركەمەدى
الايدا Telegram-ارنالار تاراتقان مالىمەتكە سايكەس، پوليسيا ءىستى قوزعاۋدان باس تارتقان.
«تەكسەرۋ ناتيجەسىندە ارىزدا كورسەتىلگەن ۋاجدەردە ق ر قىلمىستىق كودەكسىندە قاراستىرىلعان قۇقىق بۇزۋشىلىق بەلگىلەرى انىقتالمادى. سوندىقتان ماتەريالدار ق ر قىلمىستىق-پروسەستىك كودەكسىنىڭ تالاپتارىنا سايكەس ءبىرىڭعاي تەرگەۋ تىزىلىمىنە تىركەلمەي قالدىرىلدى»، - دەلىنگەن پوليسيا جاۋابىندا.
ساراپشى مينيسترلىكتىڭ ەسەبىنە كۇمان كەلتىردى
پاۆلوۆ ۇسىنعان رەسمي مالىمەتتەر مەن اۋىل شارۋاشىلىعى مينيسترلىگىنىڭ وكىلدەرىنىڭ مويىنداۋلارى ونىڭ ءۋاجىنىڭ نەگىزدى ەكەنىن كورسەتەدى. ساراپشىنىڭ ايتۋىنشا، بۇل جاعداي مينيسترلىكتىڭ رەسمي مالىمدەمەلەرى مەن نارىقتاعى شىنايى جاعداي اراسىنداعى الشاقتىقتى ايقىن كورسەتەدى جانە اگرارلىق ەسەپتىلىكتىڭ ناقتىلىعىنا كۇمان تۋعىزادى.
