استانانىڭ قالالىق ورتا ساپاسىن باقىلاۋ جانە قاداعالاۋ باسقارماسى حانبولات نازاربايەۆتىڭ اعاسى دانيار كەسىكبايەۆقا سىيعا تارتقان جەر تەلىمىنە قاتىستى سوتقا جولداعان تالاپ-ارىزىن قايتارىپ الدى، دەپ حابارلايدى Dalanews.kz.
Nege.Asha تەلەگرام-ارناسىنىڭ مالىمەتىنشە، بۇعان دەيىن باسقارما جەر تەلىمىندەگى نىسان بۇزىلۋعا جاتاتىنىن العا تارتىپ، سىيعا تارتۋ شارتىن جارامسىز دەپ تانۋدى سۇراعان. الايدا كەيىن باسقارما ءوز باستاماسىمەن تالاپ-ارىزدى كەرى قايتارىپ، سوت بۇل ءوتىنىشتى قاناعاتتاندىردى.
“بولات ۇلى ح. مەن كەسىكبايەۆ د.د.-عا قاتىستى سىيعا تارتۋ شارتىن جارامسىز دەپ تانۋ تۋرالى تالاپ-ارىز قازاقستان رەسپۋبليكاسىنىڭ ازاماتتىق پروسەستىك كودەكسىنىڭ 279-بابىنا سايكەس باسقارما تاراپىنان قايتارىپ الىندى”، — دەپ مالىمدەدى باسقارما باسشىسىنىڭ ورىنباسارى مىندەتىن اتقارۋشى اۋباكيروۆ Nege.Asha-عا.
ايتا كەتەيىك، بۇل جەر تەلىمىندە ساۋدا ويىن-ساۋىق ورتالىعىن (ترس) سالۋ جوسپارلانعانىمەن، قۇرىلىسقا رەسمي رۇقسات ءالى الىنباعان.
ەسكە سالايىق، بۇعان دەيىن مارقۇم بولات نازاربايەۆتىڭ ۇلى حانبولات استاناداعى سوت شەشىمىمەن بۇزىلۋعا مىندەتتەلگەن قۇرىلىس نىسانىن اعاسى دانيار كەسىكبايەۆقا سىيعا تارتىپ جىبەرگەن ەدى. بۇل تۋرالى Nege.Aqsha مالىمدەدى.
ايتا كەتەلىك، بىلتىرعى جىلدىڭ 20 اقپاندا اكىمشىلىك قۇقىقبۇزۋشىلىق جونىندەگى اۋدانارالىق سوت بولات نازاربايەۆتىڭ مايرا قۇرمانعالييەۆادان تۋعان ۇلىنا استاناداعى تاۋەلسىزدىك داڭعىلىنىڭ بويىنداعى ويىن-ساۋىق ورتالىعىن زاڭسىز سالعانى ءۇشىن 103 500 تەڭگە ايىپپۇل سالعان.
حانبولات نازاربايەۆ بۇل ۋچاسكەنى 2020 جىلى اقپاندا كامەلەتكە تولۋىنا وراي سىي رەتىندە العان. وسىلايشا بۇرىن بۇل جەردە ورنالاسقان ءقوناقۇي كەشەنىن بۇزىپ، ونىڭ ورنىنا ساۋدا ويىن-ساۋىق ورتالىعىن قۇرىلىس رۇقساتىنسىز جانە الدىن الا ەسكەرتۋسىز جۇرگىزە باستاعان.
سوت ەكس-پرەزيدەنتتىڭ (نۇرسۇلتان نازاربايەۆتىڭ — ەسك.) نەمەرە ىنىسىنە ايىپپۇل تولەتىپ قانا قويماي، زاڭسىز قۇرىلىستى بۇزۋعا مىندەتتەگەن ەدى. حانبولات نازاربايەۆ بۇل شەشىمگە قارسىلىق ءبىلدىرىپ، عيماراتتى بۇزباۋعا رۇقسات سۇراعانىمەن، قالالىق سوت ونىڭ ءوتىنىشىن قابىلداماعان.
جاقىندا بەلگىلى بولعانداي، حانبولات نازاربايەۆ بۇل نىساندى ءوز اعاسى دانيار كەسىكبايەۆقا سىيعا تارتقان. اعايىندىلار ءبىر انادان تۋعان، الايدا اكەلەرى بولەك
استانا قالاسىنىڭ ورتا ساپاسى جانە باقىلاۋ باسقارماسىنىڭ باسشىسى عاني تاجييەۆ عيماراتتى ماجبۇرلەپ بۇزۋ تۋرالى قاۋلى ق ر ادىلەت مينيسترلىگىنىڭ استانا قالاسىنداعى ادىلەت دەپارتامەنتىنە جىبەرىلگەنىن حابارلاعان بولاتىن.
دەپارتامەنتتىڭ مالىمەتىنشە، حانبولات نازاربايەۆ بۇل نىساندى دانيار كەسىكبايەۆقا سىيعا تارتۋ شارتىن راسىمدەگەن. وسىعان بايلانىستى باسقارما سىيعا تارتۋ شارتىن زاڭسىز دەپ تانۋ تۋرالى تالاپ-ارىز جولداعان. باسقارما بۇل ارەكەتتى سوت شەشىمىن ورىنداۋدان جالتارۋ دەپ ساناپ، ونى زاڭسىز دەپ تانۋدى تالاپ ەتۋدە.
Dalanews-تىڭ پايىمداۋىنشا، حانبولات نازاربايەۆ مەنشىك يەسىن اۋىستىرۋ ارقىلى سوت شەشىمىن ورىنداۋدى قيىنداتۋ نەمەسە ونى سوزا ءتۇسۋدى جوسپارلاپ وتىر. سىيعا تارتۋ شارتىن جاڭا مەنشىك يەسىنە بايلانىستى سوت ارقىلى قايتا قاراۋ – پروسەستى سوزۋدىڭ ىقتيمال ءتاسىلى.
حانبولات نازاربايەۆ 22 جاسىندا بىرنەشە كومپانيانىڭ قۇرىلتايشىسى بولىپ ۇلگەرگەن. ولاردىڭ قاتارىندا Newkazgroup development جانە امانات-building قۇرىلىس فيرمالارى، Imexpharma فارماسيەۆتيكالىق كومپانياسى جانە BN HAN invest group ينۆەستيسيالىق فيرماسى بار.
