Astananyń Qalalyq orta sapasyn baqylaý jáne qadaǵalaý basqarmasy Hanbolat Nazarbaevtyń aǵasy Daniiar Kesikbaevqa syiǵa tartqan jer telimine qatysty sotqa joldaǵan talap-aryzyn qaitaryp aldy, dep habarlaidy Dalanews.kz.
Nege.Asha telegram-arnasynyń málimetinshe, buǵan deiin basqarma jer telimindegi nysan buzylýǵa jatatynyn alǵa tartyp, syiǵa tartý shartyn jaramsyz dep tanýdy suraǵan. Alaida keiin basqarma óz bastamasymen talap-aryzdy keri qaitaryp, sot bul ótinishti qanaǵattandyrdy.
“Bolatuly H. men Kesikbaev D.D.-ǵa qatysty syiǵa tartý shartyn jaramsyz dep taný týraly talap-aryz Qazaqstan Respýblikasynyń Azamattyq protsestik kodeksiniń 279-babyna sáikes basqarma tarapynan qaitaryp alyndy”, — dep málimdedi basqarma basshysynyń orynbasary mindetin atqarýshy Aýbakirov Nege.Asha-ǵa.
Aita keteiik, bul jer teliminde saýda oiyn-saýyq ortalyǵyn (TRTs) salý josparlanǵanymen, qurylysqa resmi ruqsat áli alynbaǵan.
Eske salaiyq, buǵan deiin marqum Bolat Nazarbaevtyń uly Hanbolat Astanadaǵy sot sheshimimen buzylýǵa mindettelgen qurylys nysanyn aǵasy Daniiar Kesikbaevqa syiǵa tartyp jibergen edi. Bul týraly Nege.Aqsha málimdedi.
Aita ketelik, byltyrǵy jyldyń 20 aqpanda Ákimshilik quqyqbuzýshylyq jónindegi aýdanaralyq sot Bolat Nazarbaevtyń Maira Qurmanǵalievadan týǵan ulyna Astanadaǵy Táýelsizdik dańǵylynyń boiyndaǵy oiyn-saýyq ortalyǵyn zańsyz salǵany úshin 103 500 teńge aiyppul salǵan.
Hanbolat Nazarbaev bul ýchaskeni 2020 jyly aqpanda kámeletke tolýyna orai syi retinde alǵan. Osylaisha buryn bul jerde ornalasqan qonaqúi keshenin buzyp, onyń ornyna saýda oiyn-saýyq ortalyǵyn qurylys ruqsatynsyz jáne aldyn ala eskertýsiz júrgize bastaǵan.
Sot eks-prezidenttiń (Nursultan Nazarbaevtyń — esk.) nemere inisine aiyppul tóletip qana qoimai, zańsyz qurylysty buzýǵa mindettegen edi. Hanbolat Nazarbaev bul sheshimge qarsylyq bildirip, ǵimaratty buzbaýǵa ruqsat suraǵanymen, qalalyq sot onyń ótinishin qabyldamaǵan.
Jaqynda belgili bolǵandai, Hanbolat Nazarbaev bul nysandy óz aǵasy Daniiar Kesikbaevqa syiǵa tartqan. Aǵaiyndylar bir anadan týǵan, alaida ákeleri bólek
Astana qalasynyń orta sapasy jáne baqylaý basqarmasynyń basshysy Ǵani Tájiev ǵimaratty májbúrlep buzý týraly qaýly QR Ádilet ministrliginiń Astana qalasyndaǵy Ádilet departamentine jiberilgenin habarlaǵan bolatyn.
Departamenttiń málimetinshe, Hanbolat Nazarbaev bul nysandy Daniiar Kesikbaevqa syiǵa tartý shartyn rásimdegen. Osyǵan bailanysty basqarma syiǵa tartý shartyn zańsyz dep taný týraly talap-aryz joldaǵan. Basqarma bul áreketti sot sheshimin oryndaýdan jaltarý dep sanap, ony zańsyz dep tanýdy talap etýde.
Dalanews-tyń paiymdaýynsha, Hanbolat Nazarbaev menshik iesin aýystyrý arqyly sot sheshimin oryndaýdy qiyndatý nemese ony soza túsýdi josparlap otyr. Syiǵa tartý shartyn jańa menshik iesine bailanysty sot arqyly qaita qaraý – protsesti sozýdyń yqtimal tásili.
Hanbolat Nazarbaev 22 jasynda birneshe kompaniianyń quryltaishysy bolyp úlgergen. Olardyń qatarynda Newkazgroup development jáne Amanat-building qurylys firmalary, Imexpharma farmatsevtikalyq kompaniiasy jáne BN HAN invest group investitsiialyq firmasy bar.
