ۇكىمەت باسشىسى قالانىڭ اكىمشىلىك-ىسكەرلىك ورتالىعىندا وبلىس اكىمدىگى، باسقارمالار مەن دەپارتامەنتتەر عيماراتتارى، مەديا ورتالىق، كونگرەسس-حولل سالىناتىن قۇرىلىس الاڭدارىندا بولدى. قالا قۇرىلىسىنىڭ باسىم باعىتى — الەۋمەتتىك ماڭىزداعى نىسانداردى: ستاديون، وقۋشىلار سارايىن، حالىققا قىزمەت كورسەتۋ ورتالىعىن سالۋ. مۋزىكا مەكتەبىن، باسسەينى بار سپورت سارايىن، وبلىستىق عىلىمي-امبەباپ كىتاپحانا سالۋ جوبالارى دايىندىق ساتىسىندا تۇر. حالىقتىڭ قولايلى ءومىر ءسۇرۋىن قامتاماسىز ەتۋ ماقساتىندا ءوڭىردى اباتتاندىرۋ نىساندارىن دايىنداۋ جۇمىستارى جۇرگىزىلۋدە، ولار: تۇڭعىش پرەزيدەنت پاركى، اتتراكسيوندارى بار قالا ساياباعى، مۋزىكالىق فونتان، امفيتەاتر، اربات. بارلىق قۇرىلىس جۇمىستارى كەستەگە سايكەس جۇرگىزىلىپ جاتىر جانە بەلگىلەنگەن مەرزىمدە اياقتالادى.
ق ر پرەمەر-مينيسترى ا. مامين جۇمىس ساپارى اياسىندا وبلىس ورتالىعىنىڭ كىرۋ قاقپالارىمەن قالانى بايلانىستىراتىن ب. ساتتارحانوۆ داڭعىلىنىڭ ۋچاسكەسىن تەكسەردى، ونى رەكونسترۋكسيالاۋ جۇمىستارى جۇرگىن بولىكتى 18 مەترگە دەيىن كەڭەيتۋگە مۇمكىندىك بەرەدى. ق ر ۇكىمەتىنىڭ باسشىسى تۇركىستان قالاسىنىڭ ماڭىندا «جاسىل بەلدەۋ» قۇرۋ، يرريگاسيالىق جۇيەنى دامىتۋ بويىنشا جۇمىستاردى تەكسەردى. «ارىس – تۇركىستان» كانالىنىڭ رەكونسترۋكسياسىنىڭ جانە «ماشيننىي» كانالى قۇرىلىسىنىڭ جوسپارى قارالدى. جوبالاردى ىسكە اسىرۋ سۋاراتىن سۋ تاپشىلىعى ماسەلەسىن تولىق شەشىپ، اۋىل شارۋاشىلىعى ونىمدەرىن ءوندىرۋدىڭ جىل سايىنعى كولەمىن ارتتىرۋعا مۇمكىندىك بەرەدى. يندۋستريالىق ايماق اۋماعىن كەڭەيتۋ جانە «TURKISTAN» اەا ىسكە قوسۋ جوبالارى تانىستىرىلدى. ينفراقۇرىلىمدى جولعا قويۋ جەكە ينۆەستيسيالار اعىمىن تارتۋعا مۇمكىندىك بەرەدى دەپ بولجانعان.
قالانىڭ تاريحي-مادەني بولىگىن دامىتۋعا ەرەكشە نازار اۋدارىلدى. ق ر پرەمەر-مينيسترى ق. ا. ياسساۋي مۋزەيىنىڭ، تۋريستىك ۆيزيت-ورتالىقتىڭ، تاريحي ساۋلەت فورماسىنداعى شىعىس مونشاسىنىڭ قۇرىلىسى ءجۇرىپ جاتقان جەرلەردى ارالادى. ءوڭىر اكىمدىگى «ازىرەت سۇلتان» مۋزەي-قورىعىنىڭ اۋماعىن اباتتاندىرۋ جانە قالاشىقتىڭ تاريحي نىساندارىن رەستاۆراسيالاۋ جۇمىستارىنىڭ جوسپارىمەن تانىستىردى.
نىسانداردى ارالاۋ قورىتىندىسى بويىنشا ق ر پرەمەر-مينيسترى اسقار مامين تۇركىستان قالاسىنىڭ 2019–2020 جىلدارعا ارنالعان كەشەندى قۇرىلىس جانە دامىتۋ جوسپارىن ىسكە اسىرۋ ماسەلەلەرى جونىندە جۇمىس كەڭەسىن وتكىزدى.
تۇركىستان وبلىسىنىڭ اكىمى ءو. شوكەيەۆ قۇرىلىس، تاريحي- مادەني نىسانداردى رەكونسترۋكسيالاۋ، تۇرعىن ءۇي ماسەلەلەرىن شەشۋ، ينجەنەرلىك-كوممۋنيكاسيالىق ينفراقۇرىلىم جۇرگىزۋ، جولداردىڭ ساپاسىن ارتتىرۋ، تۋريزم، اۋىل شارۋاشىلىعى سالالارىن، ارنايى ەكونوميكالىق ايماقتى دامىتۋ قارقىندارى تۋرالى باياندادى.
وسى جىلدىڭ سوڭىنا دەيىن تۇركىستان قالاسىنىڭ اكىمشىلىك-ىسكەرلىك ورتالىعىندا 52 كوپپاتەرلى تۇرعىن ءۇي پايدالانۋعا بەرىلەدى، بۇل – 2300-دەن استام پاتەر، ولاردىڭ ىشىندە 1200 وتباسى، سونىڭ ىشىندە 270 از قامتىلعان كوپ بالالى وتباسى «نۇرلى جەر» باعدارلاماسى بويىنشا باسپانامەن قامتاماسىز ەتىلەدى. ۇزىندىعى 82،5 شاقىرىم بولاتىن 69 كوشەنى جوندەۋ، ۇزىندىعى 42،2 شاقىرىمدىق 47 كوشەنى اباتتاندىرۋ، سونداي-اق ۇزىندىعى 12،8 شاقىرىم بولاتىن ۆەلوسيپەد جولىن سالۋ جۇمىستارى باستالدى. ءوڭىردى گازداندىرۋ ءۇشىن 31،1 شاقىرىم ماگيسترالدىق گاز قۇبىرى سالىنادى، 2020 جىلعا قاراي قالانى تابيعي گازعا 100% قوسۋ كوزدەلگەن. جالپى العاندا، قۇرىلىس جۇمىستارىنا 400-دەن استام تەحنيكا جۇمىلدىرىلىپ، 3500 ادام جۇمىسقا تارتىلعان. جازعى كەزەڭدە قوسىمشا 2500 ادامدى جۇمىسپەن قامتۋ جوسپاردا بار.
تۇركىستان قالاسىنىڭ اۋماعىنداعى جەكەلەگەن نىسانداردىڭ الەمدىك ماڭىزىن ەسكەرە وتىرىپ، كەڭەسكە حالىقارالىق ساراپشىلار توبىنىڭ مۇشەلەرى: دۇنيەجۇزىلىك مۇرا وبەكتىلەرىن ساقتاۋدىڭ جاي-كۇيىن باعالاۋ بويىنشا ەسكەرتكىشتەر مەن وبەكتىلەر جونىندەگى حالىقارالىق كەڭەستىڭ (ICOMOS) اعا ساراپشىسى، پروفەسسور ميحاەل يانسەن (گەرمانيا)، CIPA مۇرا قۇجاتتارى جونىندەگى عىلىمي كوميتەتىنىڭ ICOMOS ساراپشىسى، دوكتور ونا ۆيلەيكيس تامايو (كانادا) قاتىستى. ق ر مادەنيەت جانە سپورت ءمينيسترى ا. مۇحامەدي ۇلى ساراپشىلارمەن بىرلەسىپ، ق. ا. ياسساۋي ەسكەرتكىشىنىڭ جاعدايى، بەكىنىس قابىرعاسىن قايتا قالپىنا كەلتىرۋ جانە رەستاۆراسيالاۋ جۇمىستارىنىڭ كەسەنەنىڭ كورنەكى قابىلدانۋىنا اسەرى زەردەلەنىپ جاتقانىن مالىمدەدى.
يندۋستريا جانە ينفراقۇرىلىمدىق دامۋ ءبىرىنشى ۆيسە-مينيسترى ق. وسكەنبايەۆ، ەنەرگەتيكا ۆيسە-مينيسترى م. مىرزاعالييەۆ تۇركىستان قالاسىنىڭ كولىك، ينجەنەرلىك-كوممۋنيكاسيالىق ينفراقۇرىلىم، ەنەرگيامەن، گازبەن جانە جىلۋمەن قامتۋ جەلىلەرىن دامىتۋ تۋرالى باياندادى. تۇركىستان قالاسىنداعى نىسانداردى جۇزەگە اسىرۋعا جاۋاپتى اقتوبە، پاۆلودار، باتىس قازاقستان، سولتۇستىك قازاقستان وبلىستارىنىڭ جانە نۇر-سۇلتان، الماتى قالالارى اكىمدەرىنىڭ ورىنباسارلارىنىڭ ەسەپتەرى تىڭدالدى.
«كۇشەيتىلگەن جۇمىس رەجيمىن ەنگىزەمىز»، – دەپ ۇكىمەت باسشىسى، «ەكى اپتا ىشىندە قۇرىلىس جۇمىستارىن تاۋلىك بويعى رەجيمگە كوشىرۋدى» تاپسىردى.
نىسانداردى ۋاقىتىلى پايدالانۋعا بەرۋ ءوڭىردىڭ الەۋمەتتىك-ەكونوميكالىق دامۋىن قامتاماسىز ەتۋگە، قالانىڭ تۇركى دۇنيەسىنىڭ اسا دامىعان مادەني-رۋحاني جانە تۋريستىك ورتالىعى رەتىندە قالىپتاسۋىنا جول اشادى.
ق ر پرەمەر-مينيسترىنىڭ باسپا ءسوز قىزمەتى
