استانادا ءوتىپ جاتقان قازاقستاننىڭ ەۋرازيالىق بيزنەس قاۋىمداستىعىنىڭ اياسىندا ق ر ينۆەستيسيالىق كليماتىن جاقسارتۋ ماقساتىندا دوڭگەلەك ۇستەل بارىسىندا  ق ر ينۆەستيسيالار جانە دامۋ ءمينيسترى اسەت يسەكەشيەۆ «قازاقستان وڭتايلى ينۆەستيسيالىق كليماتتى قۇرۋعا، قولداۋعا دايىن» ەكەنىن ايتتى.

ءوز سوزىندە مينيستر: «ەلباسىمىز ن.نازاربايەۆتىڭ بۇيرىعىمەن ينۆەستيسيالىق شارالار ءۇشىن ينتەگراسيالىق جۇيە قۇرىلدى. بۇل جۇيە ينۆەستورلار توبىمەن بىرلەسە جۇمىس اتقارۋدى قامتاماسىز ەتەدى. جۇيە ينۆەستورلاردىڭ بارلىق دەڭگەيىن (سىرتقى - ورتالىق - ايماقتىق) قولدايدى. 2016 جىلدان باستاپ ق ر ينۆەستيسيالار جانە دامۋ مينيسترلىگى ينۆەستورلار ءۇشىن One-Stop-Shop جۇيەسىنە ەندى. بۇل دەگەنىمىز - بارلىق ينۆەستورلار وزىنە قاجەتتى اقپارات، شەشىم، ليسەنزيا، كوممۋنالدىق قىزمەتتىڭ بارلىعىن ءبىر جەردەن الاتىن بولادى. جىلدىڭ باسىنان بەرى One-Stop-Shop ارقىلى 500 ينۆەستورعا قىزمەت كورسەتىلدى» دەپ اتاپ ءوتتى.

سونداي-اق، ءمينيستردىڭ سوزىنشە، تاعى ءبىر ەڭ ماڭىزدى باعدارلاما – ەلىمىزدىڭ ەكونوميكالىق دامۋىن ارتتىراتىن ينفراقۇرىلىم قۇرۋ. بۇل مەملەكەتتىك سەكتورلارعا دا، جەكە سەكتورلارعا دا وتە ءتيىمدى.

«جاڭا ينۆەستورلار تارتۋدىڭ ءبارى ەلىمىزگە پايداسىن اكەلە بەرمەيدى» دەگەن اسەت يسەكەشيەۆ سوندىقتان بۇرىننان بىرلەسىپ جۇمىس اتقارىپ جۇرگەن ينۆەستورلاردىڭ 60 پايىزىن قايتا جاڭعىرتقالى وتىرعاندارىن مالىمدەي كەلىپ: «قازاقستان وڭتايلى ينۆەستيسيالىق كليماتتى قۇرۋعا، قولداۋعا دايىن. كەز كەلگەن باستامالارىڭىزدى قۋانا قارسى الامىز. ءاربىر ينۆەستورلار ءبىز ءۇشىن قۇرمەتتى جانە ولاردىڭ ءارقايسىسىن ەلىمىزدەگى ينۆەستيسيالىق قىزمەتتىڭ قاي دەڭگەيىندە بولسىن كورگىمىز كەلەتىنىن ايتقىم كەلەدى»، –  دەپ ءسوزىن تۇيىندەدى.

«قمد» اقپارات