ينۆەستورلار تۇرىك قۇرىلىس كومپانيالارى اساد رەجيمى قۇلاعان كەيىنگى سيريانى قالپىنا كەلتىرۋ جۇمىستارىندا شەشۋشى ءرول اتقارادى دەپ سانايدى. بۇل تۋرالى Bloomberg باسىلىمى جازدى، دەپ حابارلايدى Dalanews.kz.

"سيرياداعى باشار اساد رەجيمى قۇلاعاننان كەيىن تۇركياداعى قۇرىلىس كومپانيالارى اكسيالارىنىڭ باعاسى كۇرت ءوستى"، دەپ جازادى Bloomberg ساۋدا-ساتتىق دەرەكتەرىنە سىلتەمە جاساپ.

مۇنى Forbes دەرەكتەرى دە راستايدى: سەمەنت ءوندىرۋشى Oyak cimento كومپانياسىنىڭ اكسيالارى 9،9%، سونداي-اق Cimsa جانە Limak Dogu Anadolu Cimento باعالى قاعازدارى 10%-عا ءوستى. بولات تەمىر ءوندىرۋشى Isdemir كومپانياسىنىڭ باعالى قاعازدارىنىڭ ۇسىنىستارى دا 10%-عا وسكەن. 

Turkcimento سەمەنت ونەركاسىبى قاۋىمداستىعىنىڭ باسشىسى فاتيح ەۆجەليك ءوز سالاسىنىڭ سيرياداعى جاعداي تۇراقتانعاننان كەيىن قالپىنا كەلتىرۋ جۇمىستارىنا ات سالىسادى دەپ سانايتىنىن جەتكىزدى.

2022 جىلدىڭ اياعىندا دۇنيەجۇزىلىك بانك 2011 جىلى سوعىس باستالعاننان بەرى سيريانىڭ قالالارى مەن ونەركاسىبىنە كەلتىرىلگەن زالال 11،4 ميلليارد دوللار بولادى دەپ باعالادى.

ايتا كەتسەك، 8 جەلتوقساندا سيريالىق كوتەرىلىسشىلەر اسادتى بيلىكتەن كەتىرىپ، ەل استاناسى – داماسكتى باسىپ الدى جانە بارلىق تۇتقىنداردى تۇرمەلەردەن بوساتۋدى تالاپ ەتتى. كەيىن ۆلاديمير ءپۋتيننىڭ باسپا ءسوز حاتشىسى دميتريي پەسكوۆ اساد پەن ونىڭ وتباسىنا رەسەي فەدەراسياسى ساياسي باسپانا بەرگەنىن مالىمدەدى. رەسەيلىك اقپارات اگەنتتىكتەرى كرەملدەگى دەرەككوزدەرگە سىلتەمە جاساي وتىرىپ، اساد ماسكەۋگە جەتىپ العانىن جازدى. رەسەي ءسىم اساد قارۋلى قاقتىعىسقا قاتىسۋشىلارمەن كەلىسسوزدەردەن كەيىن سيريا پرەزيدەنتى قىزمەتىنەن كەتۋگە شەشىم قابىلدادى دەپ مالىمدەدى.