بۇل سپەكتاكل "بولاشاق – مەنىڭ تاڭداۋىم" اتتى جوبانىڭ اياسىندا وتكىزىلدى. ايتا كەتسەك، اتالعان جوباعا "شيەۆرون" كومپانياسى قولداۋ كورسەتتى.
"شيەۆرون" كومپانياسى وكىلدەرىنىڭ ايتۋىنشا، جاستاردىڭ دۇرىس جول تاڭداۋىنا كومەكتەسۋ، ءارى ولاردىڭ تۇلعا رەتىندە قالىپتاسۋىنا جول اشۋ كومپانيانىڭ الەۋمەتتىك ينۆەستيسيالارىنىڭ ىشىندەگى باستى باعىتتاردىڭ ءبىرى.
"شيەۆرون" ءوزىنىڭ ءبىلىم بەرۋ باعدارلامالارى اياسىندا وسەر ۇرپاقتىڭ ومىردەن ءوز ورنىن تابۋىنا، تالانتىن اشىپ، قابىلەتىن كورسەتۋىنە بارىنشا جاعداي جاسايدى"
– دەيدى كومپانيا وكىلدەرى.
ەندى تىكەلەي سپەكتاكل تۋرالى اڭگىمەگە كوشسەك.
يدەيانى "سالاۋاتتى كوشباسشىلىق ۋاقىتى" لاگەرىندە جازعى دەمالىسىن بىرگە وتكىزگەن جەتكىنشەكتەر ويلاپ تاۋىپتى. جاز بويى، قۇربى-قۇرداستارى دەمالىپ جاتقاندا، بالالار بىرلەسىپ سپەكتاكل سەناريىن ازىرلەگەن.
بۇعان "ارتيشوك" تەاترىنىڭ كاسىبي اكتەرى دميتريي كوپىلوۆ جەتەكشىلىك ەتىپ، بالالارعا تەاتر ونەرىنىڭ قىر-سىرىن ۇيرەتەدى.
سپەكتاكل نە تۋرالى؟
قويىلىم الماتى مەكتەپتەرىندە ءبىلىم الاتىن وقۋشىلاردىڭ ءومىرىن سۋرەتتەيدى. ءيا، مەكتەپتىڭ دە تىرشىلىگى بار. پروبلەمالارى كوپ. اتا-انالار، ۇستازدار بىلە بىرمەيتىن...قاتارلاستارىنان الىمجەتتىك كورگەنىن وقۋشىنىڭ كوپشىلىگى ايتا بەرمەيدى. مەكتەپتەگى سىنىپتاستارىمەن اراداعى كيكىلجىڭدەردى ءوز كۇشىمەن شەشكىسى كەلەدى.
مەكتەپتە ۇزدىك اتانۋعا، ۇجىمنىڭ كوشباسشىسى بولۋعا تىرىسۋ، تەتەلەستەرمەن اراداعى قىرعي-قاباق مۇنىڭ بارلىعى بار. كوپ ايتىلا بەرمەسە دە، كۇندەلىكتى كەزدەسەتىن جايت.
– ايتالىق، جاڭا مەكتەپكە، جاڭا سىنىپقا كەلگەن وقۋشى العاشقىدا قىسىلىپ جۇرەدى. قينالىڭقىرايدى. مەنىڭ مۇندايدا بەرەر كەڭەسىم، وز-وزىڭە سەنىمدى بولۋ كەرەكسىڭ. باسقالاردىڭ الدىندا ءوزىڭدى جامان جاعىنان ەمەس، جاقسى جاعىنان كورسەتىپ، ءبىلىمىڭدى دالەلدەۋگە ءتيىسسىڭ، – دەيدى وسى سپەكتاكلدە باستى رولدەردىڭ ءبىرىن سومداعان 10-شى سىنىپ وقۋشىسى ليزا زاحاروۆا.
ليزا وسى قويىلىمداعى تاكاپپارلاۋ، ءوزىن باسقالاردىڭ الدىندا جوعارى ۇستايتىن كەيىپكەردىڭ ءرولىن سومدايدى. سىنىپقا جاڭادان كەلگەن قىزدى كەمسىتكىسى كەلىپ، ءجونسىز سوقتىعىسادى. بۇل ءرولدى ديانا بەرگمان ەسىمدى وقۋشى سومداعان ەكەن. ايتپاقشى، ديانانىڭ ءوزى ومىرىندە ءتورت مەكتەپ اۋىستىرعان، سودان دا شىعار مۇنداي ماسەلەنىڭ بار ەكەنىن جاسىرمايدى.
– مەن ءوزىم سياقتى ءجيى مەكتەپ اۋىستىراتىن قۇربىلارىما مىناداي كەڭەس بەرەر ەدىم: "ءاردايىم سابىر ساقتاڭىز. سىپايى بولىڭىز. قۇربىلارىڭىز قويعان سۇراققا جاۋاپ بەرۋگە تىرىسىڭىز".
قويىلىمنىڭ سەنارييى ومىردەن الىنعان. جەتكىنشەكتەر قويىلىمدى ازىرلەي وتىرا وزدەرىنىڭ باستان كەشكەن جاعدايلارىن مىسالعا العان.
سودان دا شىعار سپەكاتل شىنايى شىعىپتى.
سىنىپتاعى ۇرىس-كەرىس، قۇربىلارىنان كورگەن شەتقاقپايدىڭ اقىرى تراگەديامەن اياقتالادى. جەتكىنشىكتەر وسى ارقىلى مەكتەپتەگى ساباقتان تىس ماسەلەلەردى كورسەتكىسى كەلگەن ءارى ولارعا نازار اۋدارۋدىڭ قاجەتتىلىگىن ايتقان.
وسىلايشا "اينا" سپەكتاكلى ءبىزدىڭ كوڭىلىمىزدەن شىقتى. "ارتيشوك" كورەرمەنگە تولى بولدى. قويىلىمدى كورۋگە اتا-انالار مەن قاتار جەتكىنشىكتەر دە كوپتەپ كەلدى. قويىلىمنىڭ كوپ ادامنىڭ كوكەيىنە وي سالعانى انىق.
