ەلوردادا ءورت ءقاۋىپتى كەزەڭى باستالعالى بەرى قالىپتاسقان احۋال، اپاتتىڭ الدىن الۋ شارالارى مەن قاۋىپسىزدىك تالاپتارىنىڭ ساقتالۋى جونىندە استانا قالاسى توتەنشە جاعدايلار دەپارتامەنتىنىڭ مەملەكەتتىك ءورت باقىلاۋ باسقارماسىنىڭ باسشىسى ءادىل براتايەۆ كوممۋنيكاسيالار قىزمەتىندە وتكەن بريفينگتە ايتىپ بەردى، - دەپ حابارلايدى Dalanews.kz
بيىل مامىر ايىنان باستاپ «استانا-ورمانى» ج ش س جاسىل بەلدەۋدى مەحانيكالىق وڭدەۋ جۇمىستارىن اۋقىمدى تۇردە جۇرگىزىپ كەلەدى. بۇگىنگى كۇنگە دەيىن جالپى اۋماعى 390 گەكتار جەرگە جىرتۋ جانە تىرمالاۋ جۇمىسى جۇرگىزىلگەن، بۇل شامامەن 600 شاقىرىمدىق ورتكە قارسى جولاققا سايكەس كەلەدى. سالىستىرا كەتسەك، 2024 جىلى بۇل كورسەتكىش 360 گەكتاردى قۇراعان.
جاسىل ايماقتا جۇرگىزىلىپ جاتقان پروفيلاكتيكالىق جۇمىس ءورتتىڭ الدىن الۋ شارالار جوسپارىنا ساي جۇزەگە اسۋدا جانە شەتكى ورمان القاپتارىندا ءورت شىعۋ ءقاۋپىن ازايتۋعا باعىتتالعان. سەبەبى بۇل اۋماقتاردا اۋا تەمپەراتۋراسى جوعارى ءارى قۇرعاق اۋا رايى ءورت شىعۋ ءقاۋپىن ارتتىرادى.
تجد ماماندارىنىڭ ايتۋىنشا، ءورتتىڭ نەگىزگى سەبەپتەرىنىڭ ءبىرى – قوقىستى جيناۋ جانە جويۋ كەزىندە ءورت قاۋىپسىزدىگى ەرەجەلەرىنىڭ بۇزىلۋى. بيىل ءساۋىر مەن ماۋسىم ايلارى ارالىعىندا رەيدتىك ءىس-شارالار بارىسىندا دەپارتامەنت قىزمەتكەرلەرى 10 رەت ءورت قاۋىپسىزدىگى تالاپتارىنىڭ بۇزىلعانىن انىقتاعان.
ءورت قاۋىپسىزدىگى ەرەجەلەرىنىڭ 59-تارماعىنا سايكەس، مەنشىك نىسانىنا قاراماستان ەلدى مەكەندەر مەن ۇيىمداردىڭ اۋماقتارى ورتكە قارسى الشاقتىق ايماقتارىندا جانعىش قالدىقتاردان، قوقىستان، قۇرعاق شوپتەن جانە باسقا دا تەز تۇتاناتىن ماتەريالداردان ۋاقىتىلى تازارتىلۋى ءتيىس.
بريفينگ سوڭىندا تجد وكىلى ەلوردا تۇرعىندارى مەن قوناقتارىنا ءورت قاۋىپسىزدىگى تالاپتارىن ساقتاۋعا شاقىردى.
«ءارقايسىمىز ورتاق يگىلىككە جاۋاپتىمىز. ءسىزدىڭ ساقتىق تانىتۋىڭىز – قالانىڭ قاۋىپسىزدىگىنە قوسقان ۇلەسىڭىز. قالا تۇرعىندارىنان قىراعىلىق تانىتۋدى، ارنايى بەلگىلەنبەگەن ورىنداردا وت جاقپاۋدى، قوقىستى ۋاقىتىلى جيناۋدى جانە ءورت شىققان جاعدايدا 112 نومىرىنە حابار بەرۋدى سۇرايمىز»، – دەپ استانالىقتارعا ۇندەۋ جاسادى تجد وكىلى.
