كسرو ىدىرىپ، وعان باعىنىشتى بولعان اۆتونوميالى رەسپۋبليكالار جەكە شاڭىراق كوتەرىپ جاتقاندا، تۇركىمەنستان رەسپۋبليكاسى دا تاريحي ساحناعا شىقتى. العاشقى پرەزيدەنتى رەتىندە «تۇركىمەنباشى» اتانعان ساپارمۇرات نيازوۆ بيلىككە كەلگەن بولاتىن. ايتسە دە، لەنين مەن ستاليننىڭ «سارا» جولىن كورگەن بۇل كوسەم سولاردىڭ ىزىمەن جۇرۋگە تىرىسىپ باقتى. تىپتەن اسىپ ءتۇستى دەسەك تە بولادى. كوشەلەر مەن مەكتەپتەرگە، قىزا كەلە تۇتاستاي قالاعا ءوز اتىن بەرۋ داستۇرگە اينالدى. كەيىن كەلە شەكتەن شىعىپ، اپتانىڭ جەتى كۇنىنە دە اۋىز سالدى. ياعني، اپتا اتتارىنا ءوز اكە-شەشەسىنىڭ ەسىمىن بەردى. ءتىرى كەزىندە-اق ءمارماردان، التىننان جاسالعان شاعىن مۇسىندەرىنە ريزا بولماي، اشحابادتىڭ ورتالىعىنان بيىكتىگى 75 مەتر بولاتىن «بەيتاراپتىق اركاسىنىڭ» توبەسىنە ورناتىلعان 12 مەترلىك ايگىلى التىن ءمۇسىنى بوي كوتەردى. ونىڭ ۇستىنە تۇركىمەنباشىنىڭ ەسكەرتكىشى ۇنەمى بەتىن كۇنگە بەرىپ اينالىپ تۇراتىن ەتىلدى. ارى قاراي تىزە بەرسەڭىز، مۇنداي اۆتوريتارلىق ىس-ارەكەتتەر جەتىپ ارتىلادى.
«تۇركىمەنباشىنىڭ» كوزى جۇمىلا سالىپ، ورنىنا كەلگەن گۋربانگۋلى بەردىمۇحاممەدوۆ ودان قالعان سارقىنشاقتاردى جويا باستادى. اتىنا بەرىلگەن وبەكتىلەردى وزگەرتتى، ەسكەرتكىشتەرىن قيراتتى. ەندى اۆتوريتارلىق جۇيە كەلمەسكە كەتكەندەي كورىنگەن. ءبىراق، بەردىمۇحاممەدوۆ تە «سارا» جولدان جاڭىلعان جوق. ەڭ اۋەلى تۇركىمەن شەنەۋنىكتەرى مەن مەملەكەتتىك اقپارات قۇرالدارى ارقىلى «ارقاداع» («قامقورشى») دەگەن نىسپىعا يە بولدى. جاقىندا عانا ءوز قۇرمەتىنە جالپى بيىكتىگى 21 مەترگە جەتەتىن الىپ ەسكەرتكىش ورناتقىزدى. ەسكەرتكىشتىڭ 15 مەترلىك تۇعىرى اق ءمارماردان قالانعان، ال احالتەكە سايگۇلىگىنە مىنگەن پرەزيدەنتتىڭ ءمۇسىنى 24 كارات التىنمەن اپتالعان. ارينە، ءمۇسىن مەملەكەت قارجىسىنا تۇرعىزىلدى. ياعني، ءسىز بەن ءبىز سياقتى تۇركىمەندەردىڭ – قاراپايىم حالىقتىڭ قالتاسىنان تولەنگەن سالىققا. ءدال وسى پرەزيدەنتتىڭ پارمەن بەرۋىمەن اشحابادتى اق قالاعا اينالدىرۋ ماقساتىندا تالاي تۇرعىن ءۇي سۇرىلگەن بولاتىن. ءبىراق تۇرعىندارعا ەش تولەماقى بۇيىرماعان. ەسەسىنە، ونىڭ ورنىنا «ارقاداعتىڭ» اسپانمەن تىرەسكەن ەسكەرتكىشى بوي كوتەردى. بۇل جاعىنان تۇركىمەنباشىعا جەتە قويماسا دا، اياق الىسى جامان ەمەس... الدا ودان دا زورعىسىن كورەتىن بولارمىز، بالكىم! ويتكەنى، تاريح قايتالانادى...
نۇرسەرىك تىلەۋقابىل
