تالدىقورعانداعى سالتانات سارايىندا وبلىستاردىڭ، استانا مەن الماتى قالالارىنىڭ ارداگەرلەر ۇيىمدارىنىڭ وكىلدەرى باس قوستى. ولار ءوزارا تاجىريبە الماسۋ ماقساتىندا «رۋحاني جاڭعىرۋ» باعدارلاماسى اياسىندا وتكىزىلگەن سەمينار-كەڭەسكە قاتىستى، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.

كىرىسپە سوزىندە مۇنداي ماڭىزدى جيىندى تالدىقورعاندا وتكىزگەندەرى ءۇشىن ۇيىمداستىرۋشىلارعا ريزاشىلىعىن جەتكىزە وتىرىپ، وبلىس اكىمى اماندىق باتالوۆ ءوڭىردىڭ الەۋمەتتىك-ەكونوميكالىق دامۋى، ايماقتا ارداگەرلەردى قولداۋ باعىتىندا اتقارالىپ جاتقان شارالار تۋرالى قىسقاشا بايانداپ بەردى.

- جالپى ءوڭىردىڭ الەۋمەتتىك-ەكونوميكالىق دامۋىندا وڭ سەرپىن بار. بۇل ورايدا ەلىمىزدىڭ دامۋى جولىندا بىلەك تۇرە ەڭبەك ەتكەن ءبىزدىڭ الدىڭعى بۋىن اعالاردىڭ ۇلەسىن ەرەكشە اتاپ ءوتۋ كەرەك. بۇگىنگى كۇنى وبلىستىق ارداگەرلەر ۇيىمىندا 215 مىڭنان استام ادام بار. ءبىز ولاردىڭ ءارقايسىسىنىڭ ەڭبەگىن ەرەكشە باعالايمىز. قۇرمەتتى دەمالىسقا شىقسا دا، بۇگىنگە دەيىن جيعان مول بىلىمىمەن، تولىمدى تاجىريبەلەرىمەن ءبولىسىپ،قوعامنىڭدامۋىنا، جاس ۇرپاقتى تاربيەلەۋگە بەلسەنە اتسالىسىپ كەلەدى. «اتالار ءسوزى – اقىلدىڭ كوزى»، - دەپ حالىق بەكەر ايتپاعان. بۇل ءسوزدىڭ، اسىرەسە، «رۋحاني جاڭعىرۋ» باعدارلاماسىنداعى مىندەتتەردى جۇزەگە اسىرۋ بارىسىندا قۇندىلىعى ارتا ءتۇستى. قوعامدىق سانانى جاڭعىرتۋدا بۇگىنگى ۇرپاق قاريالارىمىزدىڭ دانالىعىنا سۇيەنۋى ءتيىس. ءبىز دە ءوز تاراپىمىزدان ارداقتى ارداگەرلەرىمىزگە بارلىق قاجەتتى جاعدايلاردى جاساۋعا تىرىسامىز. بۇگىنگى شارا ارداگەرلەر ۇيىمدارىنىڭ كوپتەگەن ماسەلەلەرىنىڭ شەشىلۋىنە، جاڭا ءتيىمدى جوبالاردىڭ باستالۋىنا ىقپال ەتەدى دەپ ويلايمىن، - دەدى ا. باتالوۆ.

سەمينار-كەڭەستى رەسپۋبليكالىق ارداگەرلەر كەڭەسىنىڭ ءتوراعاسى، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى باقتىقوجا ىزمۇحانبەتوۆ اشىپ، وبلىس باسشىلىعىنا ارداگەرلەر كەڭەسىمەن ءوزارا تىعىز ارىپتەستىك بايلانىستارى ءۇشىن ريزاشىلىعىن ءبىلدىردى.

- بۇگىنگى شارانىڭ باستى ماقساتتارىنىڭ ءبىرى – ەلباسىنىڭ باعدارلامالىق ماقالاسىنا وراي «رۋحاني جاڭعىرۋ» باعدارلاماسىن جۇزەگە اسىرۋ اياسىندا ءوزارا تاجىريبە الماسۋ. بۇل باعىتتا ءبىزدىڭ ءارقايسىمىزدىڭ قوسار ۇلەسىمىز ماڭىزدى، - دەدى ب. ىزمۇحانبەتوۆ.

جيىن بارىسىندا اتالعان باعدارلاما نەگىزىندە اتقارىلعان جۇمىستار تۋرالى الماتى، ماڭعىستاۋ، قىزىلوردا، جامبىل وبلىستارىنىڭ جانە الماتى قالاسىنىڭ ارداگەرلەر ۇيىمدارىنىڭ باسشىلارى بايانداما جاسادى. ارداگەرلەر ۇيىمدارىنىڭ قىزمەتى، ولاردىڭ جۇمىسىن ودان ءارى جەتىلدىرۋ مالەلەرى تالقىلاندى، اقساقالدار ءوزارا پىكىر الماستى.

وسى كەزدەسۋدە وبلىس باسشىسى ا. باتالوۆ مەملەكەت جانە قوعام قايراتكەرى سەيىلبەك شاۋحامانوۆقا الماتى وبلىسىنىڭ قۇرمەتتى ازاماتى اتاعى بەرىلگەنىن جاريالاپ، ارداگەرگە ماراپات تاپسىردى.

ءوز كەزەگىندە رەسپۋبليكالىق ارداگەرلەر كەڭەسىنىڭ ءتوراعاسى ب. ىزمۇحانبەتوۆ اماندىق باتالوۆقا ورتالىق كەڭەستىڭ «قۇرمەت بەلگىسىن»، ءبىرقاتار جەتىسۋلىق ارداگەرلەرگە قۇرمەت گراموتاسى مەن العىس حاتتار تابىستادى. سونىمەن قاتار اتىراۋ وبلىسىنىڭ ارداگەرلەر ۇيىمى ءوز تاراپىنان ارىپتەستەرىنە ۇلى وتان سوعىسىنداعىداڭقتى ۇشقىش، «حالىق قاھارمانى» حيۋاز دوسپانوۆانىڭ قۇرمەتىنە دايىندالعان «حيۋاز» مەدالىن ۇسىندى.

جالپى ارداگەرلەردىڭ الماتى وبلىسىنا ساپارى ارداگەرلەر اراسىندا ۆولەيبولدان وتەتىن «جەتىسۋ كۋبوگى» حالىقارالىق ءتۋرنيرىنىڭ سالتاناتتى اشىلۋىن تاماشالاۋمەن جالعاستى.

ەسكە سالساق، بۇگىن جانە رەسپۋبليكالىق سەمينار-كەڭەس قارساڭىندا اقساقالدار تالدىقورعان قالاسىنىڭ كورنەكتى ورىندارىمەن عيماراتتارىندا بولىپ، جۇمىستارىمەن تانىستى. اتاپ ايتقاندا، قاراتال وزەنىنىڭ جاعالاۋىندا، «جاستار» ساياباعىندا، جۋرناليستەر ۇيىندە، وقۋشىلار سارايىندا، جاستارعا قىزمەت كورسەتۋ ورتالىعىندا بولىپ، كورمە پاۆيلونى مەن سالتانات سارايىن، ورتالىق الاڭداعى سكۆەردە ورناتىلعان ەلباسى ءمۇسىنىن كوردى.