قىزىلوردا وبلىسى اكىمى نۇرلىبەك نالىبايەۆ ارالعا جۇمىس ساپارى كەزىندە كوپبەيىندى اۋداندىق ورتالىق اۋرۋحانا عيماراتىن جاڭعىرتۋ جۇمىستارىمەن، «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا قولعا الىنعان جاپسارجاي قۇرىلىسىمەن تانىستى.

اۋرۋحانا عيماراتىن «سمپ قىزىلوردا» سەرىكتەستىگى قايتا جاڭعىرتۋدا. باس جوبالاۋشىسى «مەكەن جانە كومپانيا» ، ال تەحنيكالىق قاداعالاۋدى «شەبەر قۇرىلىسشى» سەرىكتەستىگى قامتاماسىز ەتەدى.

ەكى قاباتتى عيماراتتا 21 توسەكتىك ينسۋلت، 21 توسەكتىك كارديولوگيا ءبولىمى، سونداي-اق مرت جانە كت كابينەتتەرى قاراستىرىلعان. بۇل بولىمشەلەر تۇرعىندارعا ساپالى جانە جەدەل مەديسينالىق كومەك كورسەتۋگە مۇمكىندىك بەرەدى. ءقازىر نىساننىڭ قابىرعاسى قالانۋدا. قۇرىلىس ءساۋىر ايىندا باستالعان. جوسپار بويىنشا 8 ايدا اياقتالۋى ءتيىس.

ءارى قاراي وبلىس اكىمى جاپسارجايداعى جۇمىس قارقىنىن كوردى. قۇرىلىس «يمان» ج ش س مەردىگەرلىگىمەن، «بس ستروي حولدينگ» ج ش س جوبالاۋىمەن، «سك ەنەرگو-OIL» سەرىكتەستىگىنىڭ تەحنيكالىق قاداعالاۋىمەن جۇرگىزىلۋدە. قىركۇيەك ايىنىڭ سوڭىنا دەيىن پايدالانۋعا بەرىلمەك. عيمارات 25 توسەكتىك ينفەكسيالىق بولىمشەگە ارنالعان. مۇندا جۇقپالى اۋرۋ جۇقتىرعان ناۋقاستاردى وقشاۋلاپ ەمدەۋگە بارلىق جاعداي جاسالادى.

بۇگىندە ىرگەتاسى قۇيىلۋدا، جۇمىس بارىسى كەستەگە ساي.