اقتوبە وبلىسىندا گلەمپينگتەردىڭ بىرىندە بولعان جانجال كەزىندە ەر ادام وق جاراقاتىن الدى. كۇدىكتى ۇستالدى، ال زارداپ شەككەن ادام اۋىر جاعدايدا جانساقتاۋ بولىمىندە جاتىر، دەپ حابارلايدى Dalanews.kz Nur.kz-كە سىلتەمە جاساپ.

اتىس تۋرالى اقپارات الەۋمەتتىك جەلىلەر مەن Telegram-ارنالاردا تارادى. الدىن الا مالىمەت بويىنشا، وقيعا 28 ناۋرىز كۇنى كەشكە اقتوبە وبلىسىنداعى گلەمپينگتەردىڭ بىرىندە بولعان.

ەر ادامدار اراسىندا اۋىزشا جانجال تۋىنداپ، ول كەيىن قارۋ قولدانۋعا ۇلاسقان. قولدا بار دەرەككە سايكەس، زارداپ شەككەن ادام ءىش تۇسىنان جارالانعان.

كەيبىر دەرەككوزدەر بۇل وقيعاعا پوليسيا قىزمەتكەرى قاتىسى بولۋى مۇمكىن ەكەنىن ايتادى. الايدا قۇقىق قورعاۋ ورگاندارى بۇل اقپاراتتى ازىرگە تولىق راستامادى، دەگەنمەن وقيعا بولعانى رەسمي تۇردە پودتۆەرجدەندى.

اقتوبە وبلىستىق پوليسيا دەپارتامەنتى اتالعان دەرەك بويىنشا قىلمىستىق ءىس قوزعالعانىن مالىمدەدى.

ۆەدومستۆونىڭ مالىمەتىنشە، كۇدىكتى ۇستالىپ، ۋاقىتشا ۇستاۋ يزولياتورىنا قامالعان.

سونداي-اق پوليسيا زارداپ شەككەن ادامنىڭ اۋرۋحاناعا جەتكىزىلگەنىن، قازىرگى ۋاقىتتا بارلىق قاجەتتى تەرگەۋ امالدارى جۇرگىزىلىپ جاتقانىن حابارلادى. قۇقىق قورعاۋشىلار وقيعانىڭ تولىق ءمان-جايىن جانە اتىسقا اكەلگەن جانجالدىڭ سەبەپتەرىن انىقتاپ جاتىر.

بۇدان بولەك، دەپارتامەنت جالعان اقپارات تاراتقاندار زاڭ الدىندا جاۋاپ بەرەتىنىن ەسكەرتىپ، ازاماتتاردى تەك رەسمي دەرەككوزدەرگە سۇيەنۋگە شاقىردى.

دەنساۋلىق ساقتاۋ باسقارماسىنىڭ مالىمەتىنشە، جارالانعان ەر ادام حرومتاۋ اۋداندىق اۋرۋحاناسىنا جەتكىزىلگەن.

انىقتالعانداي، 36 جاستاعى ناۋقاس وق جاراقاتىمەن جانساقتاۋ بولىمىندە جاتىر. دارىگەرلەر ونىڭ جاعدايىن تۇراقتى اۋىر دەپ باعالاپ وتىر. سونىمەن قاتار ەر ادامنىڭ ەسى بار ەكەنى بەلگىلى.

وسىلايشا، مەديسينالىق كومەك كورسەتىلىپ جاتقانىنا قاراماستان، زارداپ شەككەن ادامنىڭ جاعدايى ءالى دە اۋىر كۇيىندە قالىپ وتىر.

قازىرگى ۋاقىتتا تەرگەۋ ورگاندارى وقيعانىڭ بارلىق ءمان-جايىن انىقتاۋدى جالعاستىرۋدا. اتاپ ايتقاندا:

جانجالدىڭ ناقتى سەبەبى قانداي بولعانى؛
قارۋ قانداي جاعدايدا قولدانىلعانى؛
تاپانشانىڭ كىمگە تيەسىلى ەكەنى؛
ونىڭ قىزمەتتىك مىندەت اياسىندا نەمەسە ودان تىس پايدالانىلعان-پايدالانىلماعانى.

تەرگەۋ ناتيجەسىنە قاراي قۇقىق قورعاۋ ورگاندارى قوسىمشا اقپارات بەرەتىن بولادى.