اقتاۋلىق بلوگەر تۇرمىستىق زورلىققا ۇشىراعان قىزدىڭ جاعدايىن جاريا ەتتى، دەپ حابارلايدى Dalanews.kz.
بۇل وقيعا تۋرالى الەۋمەتتىك جەلىدە اقتاۋ قالاسىنىڭ بلوگەرى ازامات سارسەنبايەۆ جازدى. بلوگەردىڭ سوزىنشە، بۇرىنعى كۇيەۋى ايەلىن ەكى ساعاتتان استام ۋاقىت بويى ۇرىپ-سوققان، 17-قاباتتان لاقتىرامىن دەپ قورقىتقان.
بلوگەردىڭ ايتۋىنشا، 26 مامىر كۇنى سوت ازامات “ي”-گە قاتىستى اكىمشىلىك قۇقىق بۇزۋشىلىق تۋرالى كودەكستىڭ 461-بابى (قورعاۋ نۇسقاماسىن بۇزۋ) بويىنشا ون تاۋلىك قاماۋ جانە ءۇش اي بويى باقىلاۋ شاراسىن قولدانۋ تۋرالى شەشىم شىعارعان.
ءقازىر وعان قاتىستى قىلمىستىق كودەكستىڭ 109-بابى (دەنساۋلىققا قاساقانا جەڭىل زيان كەلتىرۋ) بويىنشا قىلمىستىق ءىس قوزعالعان. بۇل باپ بويىنشا ءۇش جىلعا دەيىن باس بوستاندىعىنان ايىرۋ، ەكى جىلعا دەيىن بوستاندىعىن شەكتەۋ نەمەسە ەكى جىلعا دەيىن ءماجبۇرلى ەڭبەككە تارتۋ جازاسى كوزدەلگەن.
سوت وكىلدەرىنىڭ مالىمدەۋىنشە، ەر اداممەن الداعى ۋاقىتتا پروفيلاكتيكالىق اڭگىمە جۇرگىزىلەدى.
ەسكە سالا كەتەيىك، بۇعان دەيىن قىزىلوردا وبلىسىندا ءمۇعالىم ايەلىن بالتامەن ۇرىپ، ساۋساقتارىن شاپتى دەگەن كۇدىككە ىلىنگەن بولاتىن. بۇل جانتۇرشىگەرلىك وقيعا شيەلى اۋدانىنا قاراستى بالا بي اۋىلىندا ورىن العان. جۇبايىنا شابۋىل جاساعان ەر ادامنىڭ ارەكەتىنە اۋىل تۇرعىندارى دا، ارىپتەستەرى دە سەنە الماي وتىر. كۇدىكتى 21 جىل بويى مەكتەپتە بيولوگيا پانىنەن ساباق بەرگەن. مەكتەپ ۇجىمى بۇعان دەيىن ونىڭ وعاش قىلىقتارىن بايقاماعاندارىن ايتادى.
